काठमाडौं । सहकारी अभियानका समसामयिक विषयमा सत्ता साझेदार दुई प्रमुख राजनीतिक दलका सहकारी विभाग प्रमुखहरुसँग आज नेफ्स्कून केन्द्रीय कार्यालयमा छलफल भएको छ । सहकारी अभियानका जल्दाबल्दा विषयमा नेकपा एमाले तथा नेपाली कांग्रेसका सहकारी विभाग प्रमुखहरु क्रमशः खगराज अधिकारी तथा देवेन्द्रराज कडेलले नेफ्स्कूनका अध्यक्ष चन्द्रप्रसाद ढकाल तथा संघका सल्लाहकार एवम् निवर्तमान अध्यक्ष परितोष पौड्यालसँग छलफल गर्नुभएको हो ।

सहकारी अभियानमा उत्पन्न पछिल्ला घटनाक्रम, सहकारी सम्बन्धी संसदीय छानविन विशेष समितिको प्रतिवेदनले औल्याएका विषयहरु, अभियानको बहसपैरवीका मुख्य मुद्दाहरु लगायत अन्य विषयमा अत्यन्त सकारात्मक छलफल भएको नेफ्स्कूनका अध्यक्ष ढकालले जानकारी गराउनुभयो ।

खासगरी सत्ता साझेदार प्रमुख राजनीतिक दलहरुबीच सहकारी अभियानका साझा सवालहरुमा मतैक्यता कायम गरी अघि बढ्दा बहसपैरवी उपलब्धिमूलक हुने भएकाले आज महत्वपूर्ण छलफल भएको अध्यक्ष ढकालले साकोस आवाजलाई जानकारी गराउनुभयो । यस्ता खालका छलफलहरुले नै सहकारी अभियानलाई गति दिने विश्वास नेफ्स्कूनले लिएको छ ।

सहकारी क्षेत्र मुलुकको आर्थिक विकासको स्तम्भ भएको बताउँदै आएका नेकपा एमाले तथा नेपाली कांग्रेसले यो क्षेत्रका विद्यमान समस्याहरु निराकरण गर्दै संविधानको 'स्पिरिट' अनुसार यसलाई समाजवादको सारथीको रुपमा अघि बढाउनुपर्नेमा जोड दिदै आएका छन् ।