भक्तपुर । भक्तपुर जिल्ला बचत तथा ऋण सहकारी संघ लि. भक्तपुरको २० औं बार्षिक साधारण सभा आज कार्तिक २२ गते सम्पन्न भएको छ । सभाका प्रमुख अतिथि सहकारी विभागका रजिष्ट्रार पिताम्बर घिमिरेले सहकारीको मुल्य मान्यता, नीति विधिमा संचालन गराउन र सदस्यको बचत फिर्ता गराउन विभागले काम गरिरहेको बताउनुभयो ।

सहकारीको ऐन नियामावलीको व्यवस्था कार्यान्वयनमा नआउँदा मात्र सहकारीमा समस्या आएको होइन भन्ने उहाँले बताउनुभयो । उहाँले सहकारी समुदायमुखी र सदस्य केन्द्रीत व्यवसाय भएकोले सहकारी अरुले बनाउँछ भन्नेर आशमा नबसी सदस्य आफैले बनाउने हो, सोको उदाहरण भक्तपुर बचत संघले उदाहरण प्रस्तुत गर्न सकेकोमा खुशी व्यक्त गर्नुभयो । सहकारीमा बदमासी गर्न नदिन सदस्य आफै होसियार भई बदमास गर्ने सदस्यलाई पाखा लगाउनुपर्ने उहाँको भनाइ थियो । 

सभामा अतिथि नेपाल बचत तथा ऋण केन्दीय सहकारी संघ लि. (नेफ्स्कून) का अध्यक्ष चन्द्रप्रसाद ढकालले विषयगत संघहरुले ऐन नियम अनुसार सदस्य संस्थाको बचत स्विकार्ने र सदस्य संस्थालाई ऋण लगानी गर्ने कार्य गर्दै आएको बताउदैं सहकारीको सुरक्षा कवच स्थिरीकरण कोषमा आबद्ध हुन आह्वान गर्नुभयो । 

अतिथि राष्ट्रिय सहकारी महासंघका सञ्चालक सदस्य सुमन नेपालले केही सिमित व्यक्तिले सहकारीमा समस्या आएपनि नेपालको सहकारी क्षेत्रमा सुशासन, नीति, विधि हरेक हिसाबले भक्तपुर जिल्ला बचत संघ उत्कृष्ट संघ रहेको बताउनुभयो ।

बागमती प्रदेश बचत तथा ऋण सहकारी संघका संचालक कृष्ण प्रसाद सुवेदीले नेपालको उत्कृष्ट भक्तपुर जिल्ला बचत संघ रहेकामा अझ उत्कृष्ट रहन सकोस् भनी शुभकामना व्यक्त गर्नुभयो । 

सभाको सभापतित्व गर्दै संघका अध्यक्ष कृष्ण गोविन्द लाखाजुले सहकारीमा जति विद्धान भएपनि इमान्दारीता र पारदर्शिता हुनुपर्नुे जोड दिनुभयो । संघले सहकारीका सिद्धान्त, ऐन नियम र आफ्नै विनियम पालनाको अवस्था अनुगमन गरेर मात्र सदस्यता प्रदान गरेमा सहकारी अभियान शुद्धिकरण हुने बताए ।

संघका उपाध्यक्ष हरी बल्लले स्वागत मन्तव्य दिदैं सहकारी क्षेत्र बाँसको खम्बा र नक्कली महामारीमाको रोगबाट ग्रष्ट रहेको कटाक्ष गरेको सहकारी संस्था बचत दुरुपयोग सम्बन्धमा संसदीय विशेष छानविन समितिको प्रतिवेदन उपर अभियान गम्भिर हुनुपर्ने बताउनु भयो । 

अतिथि संघका निवर्तमान अध्यक्ष राधेश्याम सुवालले हालको परिस्थितिमा पनि आर्थिक प्रगति गर्न सकेकोमा खुशी व्यक्त गर्दै संघले प्रारम्भिक संस्थाहरुको वित्तीय विश्लेषण गरेर ऋण लगानीमा विविधीकरण गर्नुपर्ने विचार व्यक्त गर्नुभयो ।

सभाको मुख्य सत्रमा संघका सचिव जगनाथ प्रजापतिले संघको आ.व.२०८०/८१ को बार्षिक प्रगति प्रतिवेदन प्रस्तुत गर्दै १५ प्रतिशत लाभांश प्रस्ताव र संरक्षित पुजी फिर्ता दिने प्रस्ताव पेश गर्नुभयो । संघका कोषाध्यक्ष कान्छा भक्त घजुले आ.व. २०८०/८१ को वित्तीय प्रगति प्रतिवेदन पेश गर्नु भयो ।

सभाबाट आ.व.२०८०/८१ मा ३ अर्व ५१ करोड ४३ लाख ३ हजारको वासलात र ५ करोड ३७ लाख नाफा सहितको लेखापरिक्षण प्रतिवेदन पारित गरियो ।

साथै आ.व.२०८१/८२ मा संघको वासलात ३ अर्व ८० करोड ७१ लाखको बजेट पारित गरेको छ । संघका लेखा सुपरिवेक्षण समितिका संयोजक बालमुकुण्द उपाध्यायले आ.व.२०८०।८१ को लेखा सुपरिवेक्षण समितिको बार्षिक प्रतिबेदन पेश गर्नुभएको थियो ।

उक्त सभामा संरक्षित पुँजी फिर्ता कोष बचत र ऋणको आधारमा अधिकत्तम योगदान गर्ने बचतमा भक्तपुर बचत तथा ऋण सहकारी संस्था लि., उपकार बचत तथा ऋण सहकारी संस्था लि. र संगम बचत तथा ऋण सहकारी संस्था लि. र ऋणमा बंगलामुखी बचत तथा ऋण सहकारी संस्था लि., संचित बचत तथा ऋण सहकारी संस्था लि. र तौडोलछाप बचत तथा ऋण सहकारी संस्था लि. गरी तीन तीन वटा संस्थालाई संरक्षित पुँजी फिर्ता रकम सहित प्रशंसा पत्र वितरण समेत गरियो ।

सभामा संघमा आबद्ध २०४ वटा संस्थाहरुबाट १३९ जना प्रतिनिधि, ९ जना अतिथि, २१ जना पर्यवेक्षक र ९ जना कर्मचारी गरीे जम्मा १८८ जनाको उपस्थिति रहेको थियो । सभाको संचालन संघका संचालक काजी बहादुर पञ्चले गर्नु भएको थियो ।