काठमाडौं । दाङ जिल्लामा अवस्थित हरियाली बचत तथा ऋण सहकारी संस्था लि. एक्सेस कार्यक्रममा आवद्ध भएको छ । हरियाली साकोसका अध्यक्ष रेशम बहादुर थापा र नेफ्स्कून सदस्य सेवा कार्यालय दाङका प्रमुख विष्णु जोशीले आज त्यससम्बन्धी द्धिपक्षीय सम्झौता पत्रमा हस्ताक्षर गरी आदानप्रदान समेत गर्नुभएको छ ।

हरियाली साकोसले एक्सेस कार्यक्रममा आवद्धतासँगै संस्थागत विकासमा उल्लेख्य टेवा पुग्ने विश्वास लिएको छ । नेफ्स्कून सदस्य सेवा कार्यालयमा आयोजित उक्त कार्यक्रममा सदस्य सेवा कार्यालय व्यवस्थापन उपसमिति सदस्य शिवध्वज मल्ल, साकोसका व्यवस्थापक उमेश चौधरी तथा नेफ्स्कूनका कर्मचारी दिनेश महराको पनि उपस्थिति थियो ।

एक्सेस, एशियाली ऋण महासंघ (अकू) को प्राविधिक सहयोगमा नेफ्स्कूनले सञ्चालन गरेको साकोसहरुको गुणस्तर सुनिश्चिततासम्बन्धी अन्तर्राष्ट्रिय मान्यताप्राप्त स्तरीकरण कार्यक्रम हो ।

२०६२ साल माघ ६ गते स्थापना भएको हरियाली साकोसमा हाल ५ हजार बढी सदस्य छन् । समुदायमा आधारित उक्त साकासको कुल सम्पत्ति ४५ करोड रहेको छ भने शुद्ध संस्थागत पुँजी ८ प्रतिशत रहेको छ । हरियाली साकोसले हाल एउटा सेवा केन्द्र सञ्चालन गरेको छ भने कुल कर्मचारी २० जना छन् । साकोसको सञ्चालक समिति ९ सदस्यीय छ भने ३ सदस्यीय लेखा सुपरिवेक्षण समिति रहेको छ ।

नेफ्स्कून सदस्य सेवा कार्यालय दाङ प्रमुख जोशीका अनुसार दाङ जिल्लामा हाल एक्सेसमा ३, प्रोवेसनमा ६ र कर्ब्समा १२ संस्था आवद्ध छन् ।