इटहरी । इटहरीस्थित महिला बचत तथा ऋण सहकारी संस्था लि. ले आइतबार आयोजना गरेको रक्तदान कार्यक्रममा ८५ पिन्ट रगत सङ्कलन भएको छ । साकोसकी कोषाध्यक्ष पुनम थापा मगरको संयोजकत्वमा सम्पन्न कार्यक्रममा नेपाल रेडक्रस सोसाइटी, धरानको प्राविधिक सहयोग थियो । महिला साकोसले वार्षिक कार्य योजनामा समावेश गरी स्थापनाकालदेखि बार्षिक रक्तदान कार्यक्रम गर्दै आएको छ ।

सहकारीले सामाजिक उत्तरदायित्व अन्तर्गत वार्षिक रुपमा समुदायसँग सहकारी  शीर्षक अन्तर्गत सरसफाइ, वृक्षारोपण, डस्टबिन वितरण लगायतका काम गर्दै आएको छ । १० हजार भन्दा बढी सेयर सदस्य रहेको सो साकोसले विद्यालयमा वित्तीय साक्षरता, विपन्न समुदायलाई खाद्यान्न वितरण, निर्ब्याजी बाख्रा पालन सापटी लगायतका कार्यक्रमहरू समेत गर्दै आएको छ । साकोसले हाल ६ वटा सेवा केन्द्र मार्फत आफ्ना सदस्य सेवा दिँदै आएको छ ।