काठमाडौं । बंगलामुखी साकोसको आयोजना तथा नेफ्स्कूनको प्राविधिक सहजीकरणमा चितवनको सौराहामा कार्तिक २७ गतेदेखि साकोसका सञ्चालकहरुको क्षमता अभिवृद्धि तालिम-सीयूडीसीसी सुरु भएको छ । 

गत असोज १७ गतेको साधारणसभाबाट निर्वाचित सञ्चालक र लेखा सुपरिवेक्षण समितिका लागि यो उच्चस्तरीय तालिम राखिएको साकोसले जनाएको छ । मंसिर १ गतेसम्म चल्ने उच्चस्तरीय तालिममा साकोसको सञ्चालक समिति, लेखा सुपरिवेक्षण समिति र उच्च व्यवस्थापनको सहभागिता छ ।

साकोसका अध्यक्ष मोहनकृष्ण श्रेष्ठको अध्यक्षतामा आयोजित तालिमको उद्घाटन कार्यक्रमको प्रमुख अतिथि नेफ्स्कूनकी उपाध्यक्ष शान्ती अधिकारी रहनुभएको थियो । प्रमुख अतिथि अधिकारीले गुणस्तर सुनिश्चितता कार्यक्रमले साकोसलाई सुरक्षित बनाउने भन्दै दिगो साकोसको लागि संस्थागत पूँजी अपरिहार्य रहेकोले संस्थागत पुँजी वृद्धिमा जोड दिन आग्रह गर्नुभयो ।

उहाँले साकोसहरुले बचत तथा ऋण सहकारीको सिद्धान्तमा रहेर चल्नु पर्ने बताउनुभयो । नेफ्स्कून उपाध्यक्ष अधिकारीले सहकारीको नेतृत्व सुशासनमा चल्नुपर्ने बताउँदै यससम्बन्धी उदाहरण पनि प्रस्तुत गर्नुभएको थियो । साकोसका अध्यक्ष मोहन कृष्ण श्रेठले नेतृत्वको लागि निरन्तर सिकाइ आवश्यक रहने भन्दै यो तालिम पनि त्यही निरन्तर सिकाइको एउटा उदाहरण भएको बताउनुभयो ।

संस्थाका प्रमुख कार्यकारी अधिकृत जगतकृष्ण श्रेष्ठले नेफ्स्कूनले सञ्चालन गरेको प्रोवेसन कार्यक्रममले संस्थागत विकासमा महत्वपूर्ण भूमिका खेलेको बताउनुभयो । प्रोवेसनमा सहभागी बगलामुखी साकोसले निरन्तर उक्त कार्यक्रमका सूचकहरु परिपालनामा ध्यान दिदै आएको उहाँले जानकारी गराउनुभयो ।

उहाँका अनुसार सुर्यविनायक नगरपालिका २, बसिडोल, बालकोट, भक्तपुर मुख्य कार्यालय रहेको बंगलामुखी साकोसको कुल सम्पत्ति हाल १ अर्ब ४७ करोड रहेको छ । संस्थामा हाल ३५७० सदस्य छन् भने २४ प्रतिशत तरलता छ । साकोससँग कुल बचत १ अर्ब ८ करोड रहेको छ भने सदस्यलाई ऋण लगानी १ अर्ब ९ करोड पुगेको छ । सामुदायिक क्रियाकलापमा बंगलामुखी साकोसको सक्रियता छ ।

तालिम सहजकर्ता नेफ्स्कूनका बरिष्ठ तालिम अधिकृत कोमल राज अधिकारी र तालिम अधिकृत श्यामराजा तिमल्सिना रहनुभएको छ ।