एजेन्सी । अन्तर्राष्ट्रिय सहकारी महासंघ (आईसी) ले प्रदान गर्ने सहकारी क्षेत्रको सबैभन्दा ठूलो पुरस्कार रोचडेल पायोनियर्स अवार्ड-२०२४ बाट इन्डियन फामर्स फर्टिलाइजर कोअपरेटिभ लिमिटेड (इफ्को) का प्रबन्ध निर्देशक उदय शंकर (यूएस) अवस्थीलाई प्रदान गर्ने निर्णय गरेको छ ।

सन् १९९३ को फेब्रुअरी १ बाट इफ्कोको प्रबन्ध निर्देशकको जिम्मेवारी सम्हाल्नुभएका अवस्थीसँग सहकारी अभियानको ५० वर्ष लामो अनुभव छ । केमिकल इन्जिनियर अवस्थीको नेतृत्व कौशलका कारण मल उत्पादनमा इफ्को विश्वको अग्रणी संस्थाका रुपमा स्थापित छ । आज इफ्कोलाई विश्व मञ्चमा परिचित गराउने कार्यमा उहाँको योगदान रहेको आईसीएले जनाएको छ ।

आईसीएका अध्यक्ष एरियल ग्वार्कोले नयाँ दिल्लीमा जारी अन्तर्राष्ट्रिय सहकारी सम्मेलन २०२४ को उद्घाटन कार्यक्रममा अवस्थीलाई उक्त सम्मान प्रदान गर्ने निर्णय गरिएको जानकारी गराउनुभयो । पुरस्कार छनौटका लागि आईसीएले एक समिति गठन गरेको थियो । अवस्थी सन् २०२० को सबैभन्दा प्रभावशाली भारतीयहरुको सूचीमा समेत पर्न सफल हुनुभएको थियो । सहकारी क्षेत्रबाट प्रभावशाली भारतीयको सूचीमा पर्ने अवस्थी हालसम्मको पहिलो सहकारीकर्मी समेत हुनुहुन्छ ।

सम्मानका लागि आइसीएले केही समयअघि आवदेन माग गरेको थियो । सहकारी क्षेत्रमा नवप्रवर्तन तथा वित्तीय रुपमा सबल र दिगोपनामार्फत सदस्यहरुको हित हुने क्रियाकलापमा योगदान दिने व्यक्तिलाई यो सम्मान प्रदान गरिन्छ । खासगरी सहकारी अगुवालाई प्रदान गर्ने यो सम्मान विशेष परिस्थितिमा मात्र संस्थालाई प्रदान गरिन्छ ।

पुरस्कारका लागि गत आवेदन दिने अन्तिम मिति गत अगष्ट ३१ सम्म रहेको थियो । सहकारी अभियानलाई स्थापित गराउन बेलायतको म्यानचेष्टरस्थित रोचडेल सहरका अगुवाहरुले खेलेको भूमिकाको कदर स्वरुप आईसीएले यो सम्मान स्थापना गरेको हो ।