काठमाडौं । तितेपाती महिला बचत तथा ऋण सहकारी संस्थाको १२ औं वार्षिक साधारण सभा शनिबार बुटवलमा सम्पन्न भएको छ । सभामा नेफ्स्कून सञ्चालक ज्ञानु पौड्यालले महिलाको नेतृत्वमा रहेका सहकारीमा कुनै पनि समस्या नरहेको बताउनुभयो ।

उहाँले महिलाले नेतृत्व गरेका सहकारी सुसाशन एवम् पारदर्शी तवरमा संचालन भएकाले कुनै संकट नभएको दाबी गर्नुभयो । उहाँले आफ्नो क्षेत्राअधिकार भन्दा बाहिर गएर शाखा खोल्ने, लगानी गर्ने, अनुगमन नगर्ने जस्ता गतिविधिले पछिल्लो समय सहकारीमा समस्या उत्पन्न भएको उल्लेख गर्नुभयो ।

परिवारले ऋण लिने र साक्षीमा महिलाहरु राख्ने भएका कारण धेरै कालो सूचिमा महिलाहरु  देखिएकोे भन्दै नेफ्स्कून सञ्चालक पौड्यालले ऋण लिदाँ महिलाकै नाममा लिने भएका कारण कालो सूचीमा महिलाको संख्या उच्च देखिएको छ । जुन सुकै काम गर्दा हस्ताक्षर गर्दा र साक्षी बस्दा महिलाहरु चनाखो बन्न आवश्यक भएको उहाँले बताउनुभयो । नेपालमा सञ्चालित ३१ हजार सहकारीमा ७३ लाख सेयर सदस्य मध्ये ५६ प्रतिशत महिला सहभागिता छ । 

यस्तै  बुटवल उपमहानगर पालिका वडा नं ९ का वडा अध्यक्ष प्रदिप कुमार श्रेष्ठले तितेपाती महिला  बचत तथा ऋण सहकारीले महिला तथा समाजको हितमा धेरै असल काम गरेको बताउनुभयो । उहाँले यस संस्थालाई उद्यमशीलतामा जोड्दै अगाडि बढाउन आग्रह गर्नुभयो । महिलालाई उद्यममा जोड्न वडा, तथा नगरबाट आफ्नो सहयोग रहने प्रतिबद्धता समेत जाहेर गर्नुभयो । यस्तै राष्ट्रिय सहकारी बैंक पोखरा शाखाका प्रमुख रुकमांगत श्रेष्ठले महिलाहरुले संचालन गरेका सहकारीमा निर्धक्क भएर काम गर्न आग्रह गर्नुभयो । कार्यक्रममा संस्थापक अध्यक्ष प्रिया गुरुङ, सेयर सदस्य गंगा बस्याल ,सबनम श्रेष्ठ लगायतले मन्तव्य राख्नुभएको थियो । 

साधरणसभाले संस्थाका अध्यक्ष कमला बस्नेत कुवर तथा कोषाध्यक्ष शान्ति लक्ष्मि अर्यालले प्रस्तुत गरेको आर्थिक वर्ष २०८०/ ०८१ को प्रगति प्रतिवेदन तथा आर्थिक प्रतिवेदन पारित गरेको छ ।सभामा १२ कक्षामा उत्कृष्ट नतिजा ल्याउने सेयर सदस्यका  छोराछोरी, ज्येष्ठ नागरिक सदस्य , संस्थामा विशेष योगदान पुराउने सदस्य ,असल बचतकर्ता असल ऋणीर धेरै वचत गर्ने बाल बचतकर्ता लाइ सम्मान गरेको छ ।