पोखरा । नेपाल बचत तथा ऋण केन्द्रीय सहकारी संघ लि. (नेफ्स्कून) का अध्यक्ष चन्द्रप्रसाद ढकालले  सहकारी अध्यादेश र नेपाल राष्ट्र बैंकले जारी गरेको मापदण्ड तथा निर्देशनको मस्यौदा तथा तिनमा साकोस अभियानको धारणा सम्बन्धमा  पोखराका सहकारीकर्मीहरुसँग अन्तरक्रिया गर्नुभएको छ । उहाँले सहकारी क्षेत्रको समुन्नतिका लागि सहकारी मैत्री अध्यादेश र मापदण्ड बन्नुपर्ने आवाज देशव्यापी रुपमा उठेको प्रष्ट पार्नुभयो । 

नेफ्स्कून पोखरा सदस्य सेवा कार्यालयको आयोजनामा आज पोखरामा आयोजित व्यवसाय प्रवर्धन तथा अन्तरक्रिया कार्यक्रमलाई सम्बोधन गर्ने क्रममा अध्यक्ष ढकालले सहकारीको विकास, प्रवर्धन तथा समुन्नतिका लागि निर्माण गरिने कानूनहरु तथा जारी गरिने नियामकीय प्रबन्धहरु सहकारी फ्रेण्ड्ली हुनुपर्ने वताउनुभयो । उहाँले सहकारी अध्यादेशले थपेको केही मुख्य अड्चन तथा केन्द्रीय बैंकको निर्देशन तथा मापदण्डका केही उल्झनका सम्बन्धमा नेफ्स्कूनले अभियानको साझा धारणा, सुधार र संशोधनमार्फत समेट्नुपर्ने विषयहरु जानकारी गराइसकेको अवस्थाबारे सहकारीकर्मीहरुलाई अवगत गराउनुभयो । 
 
कास्की जिल्ला बचत संघका अध्यक्ष शेरबहादुर कार्कीको अध्यक्षतामा आयोजित उक्त कार्यक्रममा  पोखरा महानगर सहकारी समितिका अध्यक्ष रविरमण तिवारी, सिएमसी कास्कीका अध्यक्ष मोहन प्रसाद अधिकारी, नेफ्स्कूनका निवर्तमान सञ्चालक  चण्डी प्रसाद शर्मा पौडेल, नेफ्स्कून पोखरा सदस्य सेवा कार्यालय व्यवस्थापन उपसमिति सदस्य द्वय रुद्र नाथ पौडेल र टिकाराम आचार्यको आतिथ्यता रहेको थियो । कार्यक्रम सञ्चालन नेफ्स्कूनकी सञ्चालक कमलादेवी गिरीले गर्नुभएको थियो भने नेफ्स्कूनको समग्र वस्तुस्थितीको बारेमा जानकारी सेवा कार्यालयका प्रमुख सुरज चालिसेले गराउनुभएको थियो ।

अन्तरक्रियात्मक कार्यक्रममा जिल्लाका विभिन्न बचत तथा ऋण सहकारी संघ संस्थाबाट सञ्चालक समितिका सदस्य, व्यवस्थापक र कर्मचारीहरु गरि कुल ७० जनाको उपस्थिति रहेको थियो । 

कार्यक्रममा सहकारीकर्मीहरुले राख्नुभएको सहकारी सम्बन्धी समसामयिक विषयवस्तुहरुको जिज्ञासाप्रति संघका अध्यक्ष ढकालले सम्बोधन गर्नुभएको थियो ।