काठमाडौं । एशियाली ऋण महासंघ (अकू) की प्रमुख कार्यकारी अधिकृत एलिनिता भि स्यान रोके (लेनी), प्रमुख प्राविधिक अधिकृत रञ्जित हिताराची र नेफ्स्कूनका प्रमुख कार्यकारी अधिकृत डा. शिवजी सापकोटा सहितको समुहले चैत्र १ गते, शुक्रबार चन्द्रागिरि बचत तथा ऋण सहकारी संस्था लिमिटेडको स्थलगत अवलोकन गर्नुभएको छ । 

अवलोकन भ्रमणका क्रममा आयोजित संक्षिप्त अन्तरक्रिया कार्यक्रमका अवसरमा सहकारी अभियानको प्रवर्द्धन, संस्थाको सवलीकरण, दिगो सञ्जालीकरण र सदस्यहरुलाई आर्थिक रुपले कसरी सृद्धढ बनाउने भन्ने विषयमा छलफल भएको थियो । 

साकोसका अध्यक्ष शिवशंकर मानन्धरले स्वागत मन्तव्य व्यक्त गर्दै यस भ्रमणले चन्द्रागिरिको दिगो विकास र नेपालको साकोस अभियानलाई अझ बलियो बनाउने विश्वास व्यक्त गर्नुभयो । उहाँले सहकारी मूल्य, सिद्धान्त तथा व्यवसायिक सञ्चालनलाई प्रभावकारी बनाउन अकू र नेफ्स्कूनको भूमिका महत्वपूर्ण रहेको उल्लेख गर्नुभयो । 

अकूकी प्रमुख कार्यकारी अधिकृत लेनीले बचत तथा ऋण सहकारी संस्थाहरुको सशक्तीकरणमा एशियाली ऋण महासंघको भूमिका महत्वपूर्ण रहने कुरा दोहोर्याउदै सहकारीहरु विचको सहकार्य, संस्थाको वित्तीय सुरक्षा र सदस्य केन्द्रीत सेवाले दिगो साकोस निर्माण र वित्तीय समावेशीकरणलाई प्रवर्द्धन गर्ने कुरामा जोड दिनुभयो । त्यसैगरी अकूका प्रमुख प्राविधिक अधिकृत रञ्जित हितारचीले सहकारीहरुलाई प्राविधि मैत्री बनाउन आवश्यक कदमहरुको बारेमा आफ्नो धारणा राख्नुभएको थियो । 

नेफ्स्कूनका प्रमुख कार्यकारी अधिकृत डा. शिवजी सापकोटाले नेपालमा साकोस अभियानलाई थप प्रभावकारी बनाउन केन्द्रीय संघ र प्रारम्भिक संस्थाविचको सहकार्य प्रभावकारी हुनुपर्ने र चन्द्रागिरि साकोसलाई महत्वका साथ राष्ट्रिय अन्तर्राष्ट्रिय संघसंस्थाहरुले नियालीरहेको विचार व्यक्त गर्नुभयो । 

संस्थाका प्रमुख कार्यकारी अधिकृत कृष्णकुमार श्रेष्ठले संस्थाको गतिविधि योजना र प्राथमिकताहरुको बारेमा प्रस्तुतीकरण राख्दै चन्द्रागिरि साकोसले वित्तीय स्थिरता, सदस्यहरुको समुन्नती, सुशासन र समुदायको विकास अवको प्राथमिकताको क्षेत्र रहेको विषयमा प्रकाश पार्नुभएको थियो ।  लेखा सुपरिवेक्षण समितिको संयोजक भानु प्रकाश ढकालले अतिथिहरुलाई धन्यवाद ज्ञापन गर्दै अभियानलाई मजबुत बनाउन यस भ्रमण फलदायी हुने विश्वास व्यक्त गर्नुभयो । कार्यक्रममा सञ्चालक समितिका पदाधिकारी र उच्च व्यवस्थापनका कर्मचारीहरुको सहभागिता रहेको थियो ।

अकूको प्राविधिक टीम गत फागुन २५ देखि चैत्र १ गतेसम्म नेपालको बचत ऋण सहकारी अभियान सबलीकरणका लागि परामर्श प्रदान गर्ने उद्देश्यसहित नेपाल आएका थिए । सो अवसरमा नेफ्स्कून, नेफ्स्कूनका कर्मचारी, बोर्ड, एक्सेसमा आबद्ध साकोसका सिइओसँग परामर्श वैठक सञ्चालन भएका थिए भने सहकारी मन्त्री र राष्ट्रिय सहकारी नियमन प्राधिकरणका अध्यक्षसँग पनि संक्षिप्त भेट तथा अन्तरक्रिया कार्यक्रम भएको थियो । अकू प्राविधिक टीमले काठमाडौंमा रहेको सहयात्री साकोसको पनि अवलोकन भ्रमण गरेको थियो ।