नवलपरासी । सरावल गाउँपालिका १, तिलकपुरमा सञ्चालित तिलकपुर महिला बचत तथा ऋण सहकरी संस्था लिमिटेडको बचत खेल सम्बन्धी तालिम बुधबार सम्पन्न भएको छ । 

बचत खेल तालिम (SAVINGS GAME) लाई साकोसका सदस्यहरुमा वित्तीय साक्षरताको ज्ञान सँगै बचत अभियान मार्फत सुनिश्चित भविष्य निर्माण र गुणस्तर जीवन बृद्धिका लागि बहुउपयोगी तालिमको रुपमा लिईन्छ । खेलको माध्यमबाट सदस्यहरुमा आम्दानी र बचतबिचको सन्तुलन मिलाउन व्यवहारिक ज्ञानको विकासमा तालिमले जोड दिन्छ । नेफ्स्कूनले जर्मन बचत बैंकसँगको साझेदारीमा सदस्यहरुलाई निशुल्क उपलब्ध गराउँदै आएको यस तालिमले सदस्यहरुको समृद्ध र गुणस्तरयुक्त जीवन निर्माणका लागि लक्ष्य निर्धारण गर्न सिकाउँछ । 

तिलकपुर महिला साकोसको आयोजना र नेपाल बचत तथा ऋण केन्द्रीय सहकारी संघ लि.(नेफ्स्कून) र जर्मनी बचत बैंक (German Sparkassenstiftung For International Cooperation) को साझेदारीमा चैत्र ५ र ६ गते तालिम सञ्चालन भएको थियो । तालिममा तिलकपुर महिला साकोसकी अध्यक्ष  सत्यदेवी चौधरी, सञ्चालक, सेयर सदस्यहरु र कर्मचारी गरि २७ जनाको सहभागिता रहेको थियो ।

नेफ्स्कूनद्वारा नियमित बचतको महत्वलाई वैज्ञानिक खेल मार्फत सिकाउने उद्देश्यसहित निशुल्क प्रदान गरिएको तालिम अत्यन्त प्रभावकारी रहेको भन्दै साकोसकी अध्यक्ष चौधरी लगायत सहभागी प्रतिनिधिहरुले खुसी व्यक्त गरेका थिए । 

बचत खेल तालिमको सहजीकरण नेफ्स्कूनकी कार्यक्रम अधिकृत रिता सुवेदी र सन्दीपराज ढकालले गर्नुभएको थियो । तालिमले सदस्यहरुमा खेल मार्फत बचतको महत्व सिकाउँदै समृद्ध जीवन निर्माण र वित्तीय सशक्तीकरणका लागि क्षमता अभिवृद्धि गर्ने अपेक्षा गरिएको तालिम अधिकृत सुवेदीले जानकारी गराउनुभयो ।  स्पार्कासेन्स्टिफ्टुङद्वारा बनाइएका व्यावसायिक खेलहरू एक नवीन अन्तरक्रियात्मक सिकाइ अनुभवको लागि अन्तर्राष्ट्रिय ब्रान्ड बनेका छन्।