बर्दिया । ठाकुरबाबा नगरपालिका १, भुरीगाउँमा रहेको सिको बचत तथा ऋण सहकारी संस्था लिमिटेडले संस्थाका सदस्य साथै जीविकोपार्जन क्लबका सदस्यहरुका लागि बचत गरेर कमाउन सिक्ने तालिम अन्तर्गत पहिलो दिनको कक्षा सञ्चालन गरेको छ । 

"Global Money Week २०२५" को अवसर पारेर"Think before you follow, wise money tomorrow" को थिमलाई पूरा गर्ने उद्देश्यका साथ सिको साकोसको आयोजना र नेफ्स्कूनको प्राविधिक सहयोगमा संस्थाका जीविकोपार्जन क्लबका सदस्यहरू एंव अन्य सदस्यसहित ३० जनाको सहभागितामा बचत गरेर कमाउन सिक्ने (Learn, Save, Earn) बचत खेल तालिम सञ्चालन गरेको हो । 

नेफ्स्कूनका बरिष्ठ उपाध्यक्ष एवं साकोसका अध्यक्ष दामोदर अधिकारीले तालिमको औपचारिक उद्घाटन गर्नुभएको थियो । उहाँले साकोसले आफ्ना सदस्यहरुलाई जीविकोपार्जन क्लबमार्फत विविध गतिविधि साथै तालिम शिक्षाको माध्यमबाट उद्यमशिल बनाउँदै लगिरहेको र  सदस्यहरुलाई गुणस्तर जीवन निर्माणको लक्ष्यमा अगाडि बढ्न प्रेरित गरेको बताउनुभयो ।

बचत खेल तालिम (SAVINGS GAME) लाई साकोसका सदस्यहरुमा वित्तीय साक्षरताको ज्ञान सँगै बचत अभियान मार्फत सुनिश्चित भविष्य निर्माण र गुणस्तर जीवन बृद्धिका लागि बहुउपयोगी तालिमको रुपमा लिईन्छ । खेलको माध्यमबाट सदस्यहरुमा आम्दानी र बचतबिचको सन्तुलन मिलाउन व्यवहारिक ज्ञानको विकासमा तालिमले जोड दिन्छ । नेफ्स्कूनले जर्मन बचत बैंकसँगको साझेदारीमा सदस्यहरुलाई निशुल्क उपलब्ध गराउँदै आएको यस तालिमले सदस्यहरुको समृद्ध र गुणस्तरयुक्त जीवन निर्माणका लागि लक्ष्य निर्धारण गर्न सिकाउँछ । 

बचत खेल तालिमको सहजीकरण नेफ्स्कूनका तालिम अधिकृत श्यामराजा तिमिल्सिना र प्रशासन अधिकृत राम सापकोटाले गर्नुभएको थियो ।