मकवानपुर ।  नेपाल बचत तथा ऋण केन्द्रीय सहकारी संघ लि. (नेफ्स्कून) का प्रमुख कार्यकारी अधिकृत डा. शिवजी सापकोटाले मकवानपुरगढी गाउँपालिका–३, मक्रान्चुलीस्थित जागरण बचत तथा ऋण सहकारी संस्था लिमिटेड र हेटौंडा उपमानगरपालिका २ मा रहेको हातेमालो बचत तथा ऋण सहकारी संस्था लि.को आज, चैत्र ८ गते स्थलगत अवालोकन गर्नुभएको छ । गत चैत्र ४ गतेदेखि सदस्य संस्थाहरुको स्थलगत अवलोकन भ्रमणमा रहनुभएका सिइओ सापकोटाले कोशी प्रदेश अन्तर्गतका जिल्लामा सञ्चालित केही सहकारीहरुको भ्रमण गरि मधेश प्रदेशको सर्लाही र धनुषाका सहकारीहरुको भ्रमण सकेर आज बागमती प्रदेश अन्तर्गत मकवानपुरका दुई सहकारी भ्रमण गर्नुभएको हो । 

एशियाली स्तरको गुणस्तर सुनिश्चितताको कार्यक्रम एक्सेसमा आबद्ध जागरण साकोसले राष्ट्रिय प्रमाणीकरण कार्यक्रम प्रोबेशन मार्फत तीन पटक ब्राण्ड प्राप्त गर्न सफल भएको छ । घर घरमा वित्तीय सेवा पहुँच पुर्याउन सफल जागरण साकोसमा हाल ३ हजार ९ सय ५६ जना सदस्य आबद्ध छन् । सदस्यहरुलाई मोबाईल बैंकिङ सेवा समेत उपलब्ध गराएको साकोसले यही चैत्र २८ गते २६ औं स्थापना दिवसको समेत तयारी गरिरहेको छ । भ्रमणका क्रममा नेफ्स्कूनका सिइओ सापकोटा सहित नेफ्स्कून कर्मचारी र साकोसको तर्फबाट सचिव सरिना विश्वकर्मा र व्यवस्थापक मेनका दाहालसँग संक्षिप्त कुराकानी तथा समसामयिक विषयमा छलफल भएको थियो ।  

त्यसैगरि हातेमालो बचत तथा ऋण सहकारी संस्था लिमिटेड साकोस गुणस्तर सुनिश्चितताको कार्यक्रम प्रोबेशनमा आबद्ध छ । २०७६ सालमा जोखिममा आधारित साकोस सुपरिवेक्षण कार्यक्रम कर्ब्स मा आबद्ध साकोस, दुई बर्षपछि २०७८ मा प्रोबेशन कार्यक्रममा सहभागी भएको हो । २ हजार ९ सय ५ सदस्यहरुमाझ वित्तीय सेवा प्रदान गर्दै आइरहेको हातेमालो साकोस वित्तीय सुशासनमा अब्बल सहकारीको रुपमा परिचित छ । भ्रमणका क्रममा संघका सिईओ सहित नेफ्स्कून कर्मचारी टीम र साकोसका कोषाध्यक्ष दिपक दाहाल, सचिव सिताराम दाहाल, सञ्चालक सानीकान्छी बडुवाल, प्रमिला अर्याल र व्यवस्थापक रमला सापकोटाबिच संक्षिप्त कुराकानी साथै सहकारीका समसामयिक विषयमा छलफल भएको थियो ।