भक्तपुर । जिल्ला बचत तथा ऋण सहकारी संघ लि. भक्तपुरको आयोजना र नेपाल बचत तथा ऋण केन्द्रीय सहकारी संघ लि.को साझेदारी कार्यक्रम अन्तर्गत साकोसमा जोखिम विश्लेषण कार्यशाला (SACCOS Risk Analysis Workshop-SARAW), रोयल थाई हस्पिटालिट, राधेराधेमा बिहीबार सम्पन्न भएको छ ।  कार्यशालाको उद्घाटन गर्दै भक्तपुर जिल्ला बचत तथा ऋण सहकारी संघ लि.का अध्यक्ष कृष्णगोविन्द लाखाजुले आर्थिक मन्दीको कारण सहकारीमा ऋण लगानी, साँवा व्याज असुली नहुँदा सहकारीमा बचत र ऋणको सन्तुलन कायम गर्न चुनौती थपेको उहाँको भनाइ थियो । उहाँले हालै पारित विद्येयकले सहकारी संस्था सञ्चालनमा कानुनी जोखिम बढेकोले कानुन पालनाका लागि ध्यान दिनुपर्ने बताउनुभयो । उहाँले समाजिक कार्य गरेको छ भन्दैमा आर्थिक पाटोमा गरेको अनियमितताको गल्ती माफ नहुने बताउनुभयो । संस्था सञ्चालनमा समस्या देखिएमा संस्थाको श्वेत पत्र जारी गर्नुपर्ने उहाँले बताउनुभयो ।

र्काक्रममा भक्तपुर जिल्ला बचत तथा ऋण सहकारी संघ लि.का लेखा सुपरिवेक्षण समिति संयोजक बालमुकुन्द उपाध्यायले कार्यक्रममा उपलब्ध भएको जोखिम प्रतिवेदनको बारेमा संस्थामा छलफल गर्नुपर्ने विचार राख्नुभयो ।

संघका प्रमुख कार्यकारी अधिकृत बालकृष्ण धोजूले संघले पहिलो पटक साकोस जोखिम विश्लेषण कार्यशालाको आयोजना गरिएको र यो कार्यशाला कर्ब्स, प्रोवेसन, एक्सेस जस्तै स्तरीकरण कार्यक्रमको पहिलो खुड्किलोको रुपमा रहेको विचार राख्नुभयो । साथै चैत्र २० गते  भक्तपुरको चार वटै नगरपालिकामा प्रभातफेरी कार्यक्रम सहीत ६८ औं राष्ट्रिय सहकारी दिवस मनाउन लागिरहेको समेत जानकारी गराउनुभयो ।

नेफ्स्कूनका कार्यक्रम अधिकृत सोबिता मैनालीले साकोसमा जोखिम विश्लेषण कार्यशाला सञ्चालन गर्नुका साथै पर्ल्स विश्लेषण सम्बन्धमा पनि प्रशिक्षण गर्नुभएको थियो । कार्यशाला गोष्ठीमा नेफ्स्कूनका बरिष्ठ कार्यक्रम सहायक चन्द्रदेब जोशी र सूचना प्रविधि सहायक मिलन कोइरालाको सहयोगमा सहभागी ४२ वटा संस्थाहरुको वित्तीय विश्लेषण गरी जोखिम प्रतिवेदन समेत संस्थाहरुलाई वितरण गरिएको थियो । कार्यक्रममा संघमा आवद्ध संस्थाहरुका पदाधिकारी, व्यवस्थापक तथा उच्च तहका कर्मचारीहरु गरी ७५ जनाको सहभागिता रहेको थियो । कार्यशालाको औपचारिक कार्यक्रम सञ्चालन संघका अधिकृत कृष्णश्वरी ह्यौंमिखाले गर्नुभएको थियो ।