काठमाडौं । एशियाली ऋण महासंघको आयोजना र कोरियाली क्रेडिट युनियन संघ (नाकुफोक) को सहकार्यमा मार्च २६ देखि ३१ सम्म बैंकक थाइल्याण्डमा एशियन क्रेडिट युनियन युवा शिखर सम्मेलन २०२५ (ASIAN CREDIT UNIONS YOUTH SUMMIT 2025) शुरु भएको छ । बंगलादेश, इन्डोनेसिया, जापान, म्यानमार, नेपाल, फिलिपिन्स, श्रीलंका, थाइल्याण्ड र भियतनाम गरी ९ एसियाली देशहरूबाट ३४ युवाहरू थाइल्याण्डको बैंककमा भेला भएका छन् । युवा सम्मेलनमा नेपाल बचत तथा ऋण केन्द्रीय सहकारी संघ लि.(नेफ्स्कून) बाट कार्यक्रम अधिकृत सन्दिपराज ढकाल र साकोस अभियानको तर्फबाट पोखरा रोयल साकोसका लेखापाल सकिला गुरुङको सहभागिता रहेको छ । 

संयुक्त राष्ट्र संघको अन्तर्राष्ट्रिय सहकारी वर्ष (IYC २०२५) को अवसरमा आयोजित युवा शिखर सम्मेलनमा क्रेडिट युनियनका युवा पुस्ताहरुलाई सशक्त बनाउने उद्देश्य सहित अन्तरक्रियात्मक कार्यशालाहरु, नेतृत्व विकास तालिम लगायतका विविध क्रियाकलापहरु सञ्चालन हुनेछन् । क्रेडिट युनियनका युवा पुस्तालाई नयाँ सीप र ताजा दृष्टिकोणका साथ सहकारीका सदस्य र समुदाय माझमा सकारात्मक परिवर्तन ल्याउन, क्रेडिट युनियनलाई थप समावेशी, लचिलो र दिगो भविष्य निर्माणका लागि शिखर सम्मेलनले मार्ग प्रशस्त गर्ने अकूले जनाएको छ ।