काठमाडौं । टोखा नगरपालिका २ मा सञ्चालित नयाँ किरण बचत तथा ऋण सहकारी संस्था लिमिटेडले राष्ट्रिय सहकारी दिवसको असरमा चैत्र २० गते निःशुल्क आँखा शिविर सञ्चालन गरेको छ । साकोसको सामाजिक उत्तरदायित्व कार्यक्रम अन्तर्गत सदस्य स्वास्थ्य सेवामा सहयोग पुर्याउने उद्देश्यसहित जेष्ठ सदस्यहरुलाई लक्षित गरि आँखा शिविर कार्यक्रम सञ्चालन गरिएको साकोसका अध्यक्ष राधेश्याम श्रेष्ठले साकोस आवाजलाई जानकारी गराउनुभयो । टोखा नगरपालिका भित्रका सबै जसो वडाबाट सहभागिता रहेको शिविरमा ३ सय ३५ भन्दा बढी सदस्यहरुले आँखाको स्वास्थ्य जाँच गराएका थिए । 
 
शिविरमा आँखा तथा चस्मा जाँच, मधुमेह भएका बिरामीको आँखाको पर्दा रेटिनाको जाँच, निःशुल्क औषधिक वितरण, मोतिबिन्दै छनौंट र ४० बर्ष माथि उमेरका आँखाका विरामीहरुको सुगर तथा ब्लड प्रेसरको जाँच गराईएको थियो । 

नयाँ किरण साकोसको आयोजनामा गरिएको उक्त शिविरमा टोखा नगरपालिका वडा नं. २ र ३ को समन्वय, तिलगंगा आँखा प्रतिष्ठान, काठमाडौंको प्राविधिक सहयोग र सहयोगी संस्थाको रुपमा The Fred Hollows Foundation रहेको थियो । सदस्यहरुको स्वस्थ आँखाका लागि नयाँ किरण साकोसको आयोजनामा हातेमालो गरि तिलगंगा आँखा प्रतिष्ठानले प्रदान गर्नुभएको सेवा सहयोगप्रति साकोसले आभार प्रकट गरेको थियो ।