भरतपुर । प्रभात दिदीबहिनी बचत तथा ऋण सहकारी संस्था लि., चितवनका दिदीबहिनी सदस्यहरुलाई बचत खेल तालिम Savings Game प्रदान गरिएको छ । साकोसको आयोजना र German Sparkassentiftung for international cooperation को सहयोगमा चैत्र १८ र १९ गते सञ्चालन भएको तालिम नेफ्स्कूनको प्राविधिक सहजीकरणमा भएको थियो । प्रभात दिदीबहिनी साकोसकी अध्यक्ष साधना श्रेष्ठ पोखरेलको अध्यक्षतामा आयोजित तालिमको प्रमुख अतिथि नेफ्स्कूनकी उपाध्यक्ष शान्ति अधिकारी हुनुहुन्थ्यो । अधिकारी प्रभात दिदीबहिनी साकोसको प्रतिनिधित्व गर्दै नेफ्स्कूनको उपाध्यक्षमा हुनुहुन्छ ।  

तालिममा ४५ जनाको सहभागिता थियो । तालिम सहजीकरण नेफ्स्कूनका बरिष्ठ तालिम अधिकृत कोमल राज अधिकारी र अधिकृत राजन सुवेदीले गर्नुभएको थियो । तालिम सिमुलेशन (खेल माध्यम) विधिबाट गरिएको थियो । 

तालिमका अवसरमा बोल्दै प्रमुख अतिथि नेफ्स्कूनकी उपाध्यक्ष शान्ति अधिकारीले सदस्यहरुको पारिवारिक स्थायित्व कायम गर्न पारिवारिक बजेट बनाएर खर्चगर्ने बानीको विकास गर्नुपर्ने सुझाउनुभयो । अहिलेको बचतले भविष्यको समस्या समधानको लागि काम गर्ने भएको हुँदा बचतलाई प्राथमिकता दिई कार्य गर्न उहाँले अनुरोध गर्नुभयो । आफ्नो फुर्सदको समयको सदुपयोग गरेर कुनै पनि किसिमको लघु तथा घरेलु व्यवसायको माध्यमबाट  वित्तीय अवस्थामा सुधार ल्याउन सकिने र त्यसबाटै आफु कुनै न कुनै व्यवसायमा दिगो रुपमा लाग्न सकिने भएकोले समयमै घरधन्दाको कामबाट केही समय निकालेर पनि व्यावसायिक काममा अगाडि बढ्न उपाध्यक्ष अधिकारीले सहभागीहरुलाई अनुरोध गर्नुभयो । 

तालिम सदस्यहरुलाई वित्तीय साक्षरताका माध्यबाट जिवनस्तरमा सुधार गर्न सहयोग गर्ने उद्देश्य सहित सञ्चालित थियो । तालिमले सदस्यहरुको जिवनमा अप्रत्यासित घटना घट्दा सहि निर्णय लिन, पारिवारिक वित्तीय स्थायित्व काम गर्न, जीवनको गुणस्तर वृद्धि गर्न, पारिवारीक बजेट निर्माण तथा कार्यान्वयन गर्न, वर्तमान र भविष्यको आवयश्कता र चाहना पहिचान तथा सन्तुलन गरेर पुरा गर्न सहयोग पुर्याउँदछ ।

तालिमका सहभागीहरुको प्रतिनिधित्व गर्दै साकोसकी सदस्य मिना उप्रेतिले तालिम अत्यन्त राम्रो, जीवनोपयोगी रहेको र तालिमको पहिलो दिन सिकेको कुराहरु पहिलो दिनबाटै आफ्नो वित्तीय व्यवहारमा लागु गरिसकेको बताउनुभयो ।