काभ्रेपलाञ्चोक । पनौतीमा रहेको सामुदायिक बचत तथा ऋण सहकारी संस्था लिमिटेड, कुमारी सेवाकेन्द्रको आयोजना र लोकप्रिय स्वास्थ्य समाजको प्राविधिक सहयोगमा महिला सदस्यहरुको निःशुल्क पाठेघर तथा स्तन क्यान्सर परिक्षण तथा उपचार शिविर सम्पन्न भएको छ । वैशाख ३ गते बुधबार आयोजित कुमारी सेवाकेन्द्रमा आयोजित शिविरमा ५३ जना महिला सदस्यहरुले स्वास्थ्य परीक्षण गराएका थिए । 

शिविरमा साकोसका अध्यक्ष, सचिव, उपसमिति संयोजक  तथा सदस्यहरु, सञ्चालक सदस्यहरु, कुमारी र यूवाज्योती सेवाकेन्द्रका कर्मचारी, लोकप्रिय स्वास्थ्य समाजका ३ सदस्यीय प्राविधिक टिम र स्थानीय सदस्य सहित ६८ जनाको सहभागिता रहेको थियो ।

कार्यक्रम कुमारी सेवाकेन्द्र ब्यवस्थापन उप समिति संयोजक रामशरण राउतको सभापतित्व र साकोसका अध्यक्ष मुकुन्द शर्माको प्रमुखत्वमा भएको थियो । 
 
शिविरबाट पहिला सदस्यहरुले पाठेघरको मुखको क्यान्सर (VIA) परीक्षण, स्तन क्यान्सर परीक्षण, फिस्टुलाको परीक्षण र उपचार, पाठेघर (आङ) झरेको उपचार तथा निशुल्क अपरेसन र थर्मोकोगुलेशन सेवा लिनुभएको थियो ।