बैतडी । दशरथचन्द नगरपालिकाका जनप्रतिनिधि र सरोकारवालाहरुका लागि क्षमता अभिवृद्धि तालिम प्रदान गरिएको छ । दशरथचन्द नगरपालिकाको आयोजना, नेपाल बचत तथा ऋण केन्द्रीय सहकारी संघ लि.(नेफ्स्कून) को प्राविधिक सहयोग र जीवनज्योती बचत तथा ऋण सहकारी संस्था लि.को समन्वयवमा जनप्रतिनिधि, सहकारी संस्थाका अध्यक्ष तथा व्यवस्थापक र सरोकारवालाहरुका लागि क्षमता अभिवृद्धि तालिम आयोजना गरिएको हो । वैशाख १० देखि १२ गतेसम्म नगरपालिकाको सभाहलमा सञ्चालन हुने त्री दिवसीय तालिमको पहिलो दिन आज नगरपालिकाका जनप्रतिनिधिहरु र सरोकारवालाहरुका लागि तालिम प्रदान गरिएको हो । 

नगरपालिकाका नगर प्रमुख पुष्कर राज जोशीको अध्यक्षतामा तालिमको शुभारम्भ भएको थियो । तालिम कार्यक्रममा नगर उप प्रमुख कौशिला चन्द, नगरका कार्यपालिकाका सदस्यहरु, वडाका सचिवहरु, नेफ्स्कूनका तालिम प्राचार्य बल्लभ तिमिल्सीना, स्थानीय सरोकारवालाहरु सहित ५० जनाभन्दा बढीको सहभागिता रहेको थियो । तालिमको सहजीकरण नेफ्स्कूनका तालिम प्राचार्य बल्लभ तिमिल्सीनाले गर्नुभएको छ । 

नगर प्रमुख जोशीले व्यानरमा हस्ताक्षर गरि तालिम कार्यक्रमको उद्घाटन गर्नुभएको थियो । कार्यक्रममा बोल्दै प्रमुख जोशीले सहकारीका सरोकारवालाहरुको क्षमता अभिवृद्धि लगायत सहकारी प्रवर्द्धनात्मक कार्यक्रमहरु पालिकाको नीति तथा कार्यक्रममा समावेश भएअनुरुप सञ्चालन भएको जानकारी गराउनुभएको थियो । उहाँले आगामी आर्थिक वर्षमा पालिकाका सवै वडा कार्यालयहरु मार्फत कृषि क्षेत्र प्रवर्द्धनात्मक कार्यक्रम ल्याई जनताको आर्थिक जीवनस्तर सुधारका क्षेत्रमा काम गर्ने गरि बजेट विनियोजनको तयारी भएको बताउनुभयो । स्थानीय सरकारलाई सहकारी नियमन र दर्ताको अख्तियारी दिएको भएपनि जनशक्ति अभावका कारण काममा कठिनाई भएको उहाँको भनाई थियो । 

कार्यक्रममा बोल्दै नगर उप प्रमुख कौशिला चन्दले पालिकाले पहिलो पटक सहकारी सम्बन्धी महत्वपूर्ण तालिम आयोजना गरेको र यसले सहकारीका अध्यक्ष, पदाधिकारी, सञ्चालक तथा व्यवस्थापकहरुमा सहकारीप्रतिको धारणामा स्पष्टता ल्याउन सहयोग पुग्ने विश्वास व्यक्त गर्नुभएको थियो । 

कार्यक्रममा नगरपालिकाका प्रमुख प्रशासकीय अधिकृत नविन चन्द पाण्डेयले स्वागत मन्तव्य व्यक्त गर्नुभएको थियो भने कार्यक्रम सञ्चालन सहकारी शाखा प्रमुख अम्बा दत्त बोगटीले गर्नुभएको थियो । कार्यक्रमको व्यवस्थापन सहयोग नेफ्स्कून डडेलधुरा सदस्य सेवा कार्यालयका प्रमुख योगेश बोहराले गर्नुभएको थियो । 

तालिमको दोस्रो र तेस्रो दिन नगरपालिकाभित्र सञ्चालित सहकारीका अध्यक्ष र व्यवस्थापकहरुको क्षमता अभिवृद्धि गर्ने कार्यक्रम रहेको नेफ्स्कून डडेलधुरा सदस्य सेवा कार्यालयका प्रमुख योगेश बोहराले साकोस आवाजलाई जानकारी  गराउनुभयो ।