काठमाडौं । कदर बचत तथा ऋण सहकारी संस्था लि.ओमबहाल काठमाडौंको आयोजना र नेफ्स्कून र कास्कूनको संयुक्त प्राविधिक सहयोगमा जोखिममा आधारित साकोस सुपरिवेक्षण कार्यक्रम कर्ब्स काठमाडौं तेस्रो समूहको १७औं कार्यकुशलता तथा सिकाई व्यवस्थापन कार्यशाला सम्पन्न भएको छ । 

शनिबार नयाँ बानेश्वरस्थित इन्द्रेणी सुईट्स होटेलमा आयोजित कार्यशाला साकोसका अध्यक्ष बिरेन्दमान  शाक्यको अध्यक्षता  र नेफ्स्कूनका बरिष्ठ उपाध्यक्ष दामोदर अधिकारीको प्रमुख आतिथ्यतामा भएको थियो । 

बरिष्ठ उपाध्यक्ष अधिकारीले नेफ्स्कूनले सदस्य संस्थाहरुको दिगो, सुरक्षित र सबल संस्था निर्माणका लागि सञ्चालन गरिरहेको गुणस्तर सुनिश्चितताका कार्यक्रमहरुबाट साकोसमा व्यवसायिकताको विकास साथै गुणस्तरमा सुधार आएको बताउनुभयो । उहाँले प्रत्येक सहकारी संस्थाले आफ्ना सदस्यहरुको सीप तथा उद्यम विकासको क्षेत्रमा काम गर्नुपर्नेमा जोड दिनुभयो । नेफ्स्कूनले सहकारी क्षेत्रको संस्थागत विकास, प्रबर्द्धन र संरक्षणका क्षेत्रमा निरन्तर वहश पैरवी गरिरहेको छ, यदि संघको कार्यशैलीमा कुनै कमी कमजोरी महसुस गरेमा निरन्तर खबरदारीको समेत अपेक्षा गरेको बताउनुभयो । 

कार्यशालाको प्राविधिक सत्र सहजीकरण गर्दै नेफ्स्कूनका सहायक कार्यकारी अधिकृत दुर्गा प्रसाद ढकालले जोखिम सुपरिवेक्षण को विश्वव्यापी अभ्यास, अवधारणा र कार्यान्वयनको बिषयमा प्रस्तुतीकरण साथै साकोसको वित्तीय सूचकहरुमा सुधारका उपायहरुबारे विश्लेषण सहित अन्तरक्रिया गर्नुभएको थियो ।  

सहकारी संस्थालाई सुरक्षित, दिगो, सुशासित र व्यवस्थित सञ्चालन गर्ने उद्देश्यसहित करिब  ५ बर्ष अगाडि कर्ब्स काठमाडौं तेस्रो समूहमा आबद्ध ७ साकोस स्वस्थ वित्तीय सूचक निर्माणमा निरन्तर लागिपरेका छन् ।

कर्ब्स काठमाडौं तेस्रो समूहमा ७ वटा बचत तथा ऋण सहकारी संस्थाहरु सहभागी छन् । सहभागी साकोसहरुमध्ये कदर साकोस, धादिङ मन्डली साकोस, किपु साकोस, चौतारी साकोस, डल्लु एकता साकोस, अबिछिन्न साकोस र शुभसेवा साकोसले आ आफ्नो संस्थागत प्रस्तुती गरेका थिए । 

कार्यशाला सहजीकरण नेफ्स्कूनकी कार्यक्रम अधिकृत सोबिता मैनाली र कास्कूनकी कार्यक्रम अधिकृत सुनिता चलाउनेले गर्नु भएको थियो ।