काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) को तर्फबाट भूमि व्यवस्था, सहकारी तथा गरिबी निवारण मन्त्रालयका नवनियुक्त सचिव केदारनाथ शर्मालाई हार्दिक बधाई तथा कार्यकाल सफलताको शुभकामना व्यक्त गरिएको छ ।

नेफ्स्कूनका अध्यक्ष चन्द्रप्रसाद ढकालले आज भूमि व्यवस्था, सहकारी तथा गरिबी निवारण मन्त्रालयका नवनियुक्त सचिव केदारनाथ शर्मालाई भेटी समग्र अभियानको तर्फबाट हार्दिक बधाईसँगै कार्यकाल सफलताको शुभकामना व्यक्त गर्नुभएको हो । भेटमा संघका प्रमुख कार्यकारी अधिकृत डा.शिवजी सापकोटा पनि सहभागी हुनुहुन्थ्यो ।

भेटका क्रममा अध्यक्ष ढकालले नेपाल बचत तथा ऋण केन्द्रीय सहकारी संघ लि.(नेफ्स्कून) को परिचय, यसले तय गरेका मार्गदर्शन र राष्ट्रिय अन्तर्राष्ट्रिय आबद्धताका सम्बन्धमा संक्षिप्त जानकारी सचिव शर्मालाई गराउनुभएको थियो । 

सचिव शर्माले सहकारी अभियानको विषयसँग आफू अत्यन्त सकारात्मक रहेको विचार राख्दै  मन्त्रालयका नियमित काम र व्यस्तता केही कम भएसँगै अभियानसँग बसेरै छलफल गर्ने धारणा राख्नुभयो । 

 
वैशाख ८ गते बसेको मन्त्रिपरिषद बैठकले शर्मालाई सहकारी सचिवमा सरुवा गरेको थियो । यसअघि शर्मा कोशी प्रदेश सरकारको प्रमुख सचिवका रुपमा रहनुभएको थियो ।