काठमाडौं । नेपाल भ्रमणमा रहेको बंगलादेशको बचत तथा ऋण केन्द्रीय सहकारी संघ (सीसीयूएलबी) को टोलीलाई बुधबार साँझ काठमाडौंको पाँच तारा बचत तथा ऋण सहकारी संस्थाले स्वागत गरेको छ ।

 बुधबार साँझ पोखरा भ्रमण सम्पन्न गरि काठमाडौं आईपुगेको भ्रमण टोलिले काठमाडौंकै पाँच तारा साकोसको अवलोकन भ्रमण गरेको हो । सीसीयूएलबीको सहकारी भ्रमण प्रतिनिधिहरुलाई साकोसका अध्यक्ष भोलानाथ पाठकले स्वागत गर्नुभएको थियो । उक्त अवसरमा नेपाल र बंगलादेशको सहकारी अभियान बारे अनुभव साटासाट भएको थियो भने साकोसले कार्यक्रमका अवसरमा साकोस गान (सहकारी अभियान उन्नतीको आधार हो) र बचत गरौ भन्ने सहकारी गितमा नाचगान गरेर सीसीयूएलबीका भ्रमण प्रतिनिधिहरुलाई भरपुर मनोरञ्जन समेत गराएको थियो । 

समुदायरमा आधारित रहेर २ हजार १७४ जना सदस्यहरुमा वित्तीय सेवा प्रवाह गर्दै आइरहेको पाँच तारा साकोसको कुल पुँजी १ अर्व ४ करोड ४३ लाख रहेको छ । सदस्यहरुको सामाजिक, आर्थिक पाटोलाई समेत सुक्ष्म रुपले ध्यान दिँदै विविध कार्यक्रमहरु आयोजना गर्दै अगाडि बढिरहेको साकोसको सेयर पूँजी रु. ८ करोड ३० लाख ६८ हजार रहेको छ भने बचत रकम रु. ५७ करोड ६२ लाख ५२ हजार र ऋण लगानीमा ६९ करोड ५१ लाख ९२ हजार ऋण लगानी गरेको छ ।