जनकपुर । नेपाल बचत तथा ऋण केन्द्रीय सहकारी संघ लि.(नेफ्स्कून) ले आज जनकपुरमा सहकारीका समसामयिक विषयहरुमा वृहत अन्तरक्रिया गरेको छ । जनकपुरमा सञ्चालित अन्तरक्रिया कार्यक्रममा जनकपुर र महोत्तरी जिल्लामा सञ्चालित विभिन्न ४८ वटा बचत तथा ऋण सहकारी संघ संस्थाहरुबाट ५१ जनाको सहभागिता रहेको थियो । अन्तरक्रिया कार्यक्रममा संघकी उपाध्यक्ष शान्ति अधिकारी, लेखा सुपरिवेक्षण समितिका संयोजक इन्द्रराज ज्योति पौडेल, सञ्चालक शालिकराम ढकाल, प्रमुख कार्यकारी अधिकृत डा. शिवजी सापकोटा सहित कर्मचारीहरुको उपस्थिति थियो । 

नेफ्स्कूनकी उपाध्यक्ष शान्ति अधिकारीले वर्तमान समयमा सहकारीमा चुनौतिहरु छन्, त्यसको व्यवस्थापन र सुधारका लागि सरकारले पनि राष्ट्रिय सहकारी नियमन प्राधिकरण मार्फत काम शुरु गर्न गईरहेको जानकारी गराउनुभयो । नेफ्स्कूनले पनि सरोकारवालाहरुसँग निरन्तर वहश पैरवी गरिरहेको र सदस्य साकोसहरुको अनुगमन सुपरिवेक्षणको कामलाई पनि तीब्र रुपले अगाडि बढाइरहेको जानकारी गराउनुभयो । 

नेफ्स्कूनका लेखा सुपरिवेक्षण समितिका संयोजक इन्द्रराज ज्योति पौडेलले सहकारी संस्था सञ्चालनमा सुशासनको पाटोलाई प्रभावकारी रुपले पालना गर्नुपर्नेमा जोड दिनुभयो । उहाँले  नीति, विधि र प्रविधिको पालना गर्दै सदस्य केन्द्रीत सेवालाई जोडदिएर सुशासनमा सञ्चालन भएका सहकारी संस्थाहरुमा कुनै समस्या नरहेको बताउनुभयो । हामीले हिजोका दिनमा सदस्यहरुमा गरेको ऋण लगानीमा समस्या छन्, आर्थिक मन्दी आयो, व्यवसायहरु धरासायी भए, व्यापार ठप्प भयो, ऋणिले ऋण तिर्न सक्ने अवस्था रहेन, तर त्यसको समाधानका बाटाहरु पनि खोज्दै र नयाँ र सुरक्षित लगानीको पनि पहिचान गरेर अगाडि बढ्न उहाँले सुझाव प्रदान गर्नुभयो । 

त्यसैगरि प्रमुख कार्यकारी अधिकृत सापकोटाले सहकारी क्षेत्रभित्रका वर्तमान चुनौती, अवसर, नीति र सुधारको विषयमा आफ्ना विचार राख्दै संघले समस्याको समाधानका उपायहरु खोजी गरिरहेको, निरन्तर सरोकारवालाहरुसँग वहश तथा पैरवी गरिरहेको जानकारी गराउनुभयो । सहकारी ऐन संशोधनमा नेफ्स्कूनले निरन्तर पैरवी गर्दै सहकारीमैत्री ऐन निर्माणमा महत्वपूर्ण भूमिका खेलेको बताउनुभयो । कोभिड शुरु भएदेखिनै विश्व आर्थिक मन्दीको प्रभावले नेपालको अर्थतन्त्र समस्यामा पार्यो, त्यसको प्रत्यक्ष असर सहकारीमा पनि पर्यो । अहिले सहकारीले सामना गरिरहेको कानुनी, प्राविधिक र वित्तीय व्यवस्थापनको पाटोमा नेफ्स्कूनले निरन्तर अनुगमन तथा सुपरिवेक्षको कामलाई अगाडि बढाएको छ, सहकारीको दिगो विकासका लागि पारदर्शिता र सुशासन कायम गर्न कार्यक्रम मार्फत अर्थात एमआईएस सिस्टम मार्फत नियमित मोनिटरिङ गरिरहेको उहाँले बताउनुभयो ।

अन्तरक्रियामा सहभागी सहकारीकर्मीहरुले विद्यमान कानुनी असहजता, राष्ट्र बैंकद्वारा जारी नयाँ निर्देशन तथा मापदण्ड, तरलता गणनाको विषय, सहकारी नियमन प्राधिकरणको भूमिका, नेफ्स्कूनको आगामी रणनीतिहरुका सम्बन्धमा जिज्ञासा राख्नुभएको थियो । सहभागीहरुबाट प्राप्त जिज्ञासाहरुको सम्बोधन संघका सिईओ सापकोटाले गर्नुभएको थियो ।