गोरखा । नेफ्स्कून लमजुङ सदस्य सेवा कार्यालयको आयोजनामा सहकारी संघ संस्थाहरुका लागि दुई दिवसिय सुरक्षित ऋण लगानी तथा कर्मचारीहरुको क्षमता विकास तालिम सम्पन्न भएको छ । वैशाख २६ र २७ गते दुई दिन गोरखामा सञ्चालित तालिममा विभिन्न १९ वटा बचत तथा ऋण सहकारी संस्थाहरुबाट २० जनाको सहभागिता रहेको थियो ।

तालिममा सुरक्षित ऋण लगानी गर्दा अपनाउनुपर्ने नीति, प्रक्रिया र मूल्याङ्कन प्रणालीबारे जानकारी गराईएको थियो । त्यसैगरि ऋण लगानीको जोखिम न्यूनिकरणका उपायहरू, कर्मचारीहरुले कार्यालयीय कामका दौरानमा गर्नुपर्ने लेखा प्रणाली, वित्तीय व्यवस्थापन, ऋण व्यवस्थापन र सेवाग्राहीसँग व्यवहार गर्ने सीप तथा कौशलबारे प्रशिक्षण प्रदान गरिएको थियो ।

तालिम समापनका अवसरमा नेफ्स्कून लमजुङ सदस्य सेवा कार्यालय व्यवस्थापन उपसमितिका सदस्य रामबावु श्रेष्ठले तालिमका सहभागीहरुलाई धन्यवाद व्यक्त गर्दै तालिमबाट सिकोको ज्ञान सीप साकोसमा लागु गर्न अनुरोध गर्नुभएको थियो । धेरै बचत तथा ऋण सहकारी संस्थाले आवश्यक प्रक्रिया पुरा नगरि ऋण लगानी गरेको हुँदा आज सोही ऋण जोखिममा परेको प्रसस्त उदाहरणहरु रहेको बताउनुभयो । सहभागिको तर्फबाट रबिन खड्काले मन्तब्य राख्नुभएको थियो । उहाँले तालिम अत्यन्त प्रभावकारी रहेको र तालिम बाट सिकेको विषयहरु संस्थामा कार्यान्वयन गरिने बचतबद्धता व्यक्त गर्नुभएको थियो । 

तालिमको सहजिकरण नेफ्स्कूनकी कार्यक्रम अधिकृत सोबिता मैनालीले गर्नुभएको थियो भने कार्यक्रम सञ्चालन लमजुङ सदस्य सेवा कार्यालयका प्रमुख सन्देश घिमिरेले गर्नुभएको थियो ।