काठमाडौं । नेपाल सहकारी पत्रकार समाज सीजेएन र सहकारी विभागको सहकार्यमा सहकारीलाई मुल विधा बनाएर पत्रकारिता गर्ने पत्रकारहरुका लागि नगरकोटमा दुई दिवसीय पत्रकारिता तालिम प्रदान गरिएको छ ।  समाजले सहकारी क्षेत्रमा कलम चलाउने २५ जना सहकारी पत्रकारका लागि सहकारी पत्रकारिता तालिम सञ्चालन गरेको हो । 

समाजका अध्यक्ष काजी श्रेष्ठको संयोजकत्वमा भएको प्रशिक्षण कार्यक्रममा सहकारीको सैद्धान्तिक एवं कानूनी आधार, कार्यान्वयन तथा व्यवहारिक पक्ष, आर्थिक तथा सहकारी पत्रकारिता र वित्तीय क्षेत्रको नियामनको विषयमा विभिन्न प्रशिक्षकहरुले प्रशिक्षण गर्नुभएको थियो । 

शुक्रबार सुरु भएको प्रशिक्षण कार्यक्रममा पहिलो सेसन अन्तर्गत सहकारी विभागका उपरजिष्ट्रार शशी कुमार लम्साल र दोस्रो सेसन अन्तर्गत समाजका संस्थापक अध्यक्ष यादव हुमागाईंले प्रशिक्षण गर्नुभएको थियो । लम्सालले सहकारीको सैद्धान्तिक तथा कानूनी आधार र त्यसको कार्यान्वयन तथा व्यवहारिक पक्षको विषयमा प्रशिक्षण गर्नुभएको थियो । उहाँले सहकारी विभागले हाल गर्दै आएका काम कारवाही विभिन्न कानूनी अड्चनसँगै सहकारीको वर्तमान स्थिति र सहकारीमा सम्पत्ति सुद्धिकरण लगायत विषयमा प्रशिक्षण गर्नुभएको थियो ।

यस्तै, सहकारी पत्रकारिताको सम्भावना, भूमिका र चुनौतीको विषयमा प्रशिक्षण दिँदै हुमागाईंले पत्रकार र सञ्चार माध्यमले सहकारी बिटलाई दिने प्राथमिकता, यसको दायरा तथा सीमा, समाचारका विषयवस्तु र अवसरका विषयमा जानकारी गराउनुभएको थियो । 

यस्तै, शनिबार आर्थिक पत्रकारिताका विषयमा नेपाल आर्थिक पत्रकार संघका निवर्तमान अध्यक्ष मोदनाथ ढकालले प्रशिक्षण दिनुभएको थियो भने नेपाल राष्ट्र बैंकले सहकारी संस्थाका लागि जारी गरेको मापदण्ड तथा निर्देशन, सहकारीमा राष्ट्र बैंकको नियमन तथा सुपरिवेक्षण लगायतका विषयमा राष्ट्र बैंकका निर्देशक इन्द्रा चम्लागाईंको प्रशिक्षण रहेको थियो ।