पर्सा । ‘मर्यादित सहकारी समुन्नत समाज’ भन्ने मूल नाराका साथ शनिबार वीरगञ्ज बचत तथा ऋण सहकारी संस्था लि. (बिस्को) को सभा हलमा सहकारीहरूको समसामयिक विषय, समस्या तथा समाधानसम्बन्धी छलफल कार्यक्रम सम्पन्न भएको छ ।

जिल्ला बचत तथा ऋण सहकारी संघ लि. पर्साको आयोजनामा भएको यस कार्यक्रममा सहकारी क्षेत्रमा देखिएका चुनौती र समाधानका उपायबारे विभिन्न सहकारी संस्थाका सञ्चालक अध्यक्ष तथा प्रबन्धकहरूसँग छलफल भएको थियो ।

संघका अध्यक्ष हरेराम प्रसादले वर्तमान आर्थिक र बैंकिङ क्षेत्र तथा सहकारीमा देखिएका समस्या पहिचान गर्ने उद्देश्यले यस्ता कार्यक्रमको आवश्यकतामा जोड दिनुभयो । छलफलमा सहकारीका समसामयिक समस्या र तिनको समाधान कसरी गर्न सकिन्छ भन्नेविषयमा गहन छलफल भएको अध्यक्ष हरेरामले जानकारी गराउनुभयो । 

नेपाल बचत तथा ऋण केन्द्रीय सहकारी संघ लि. (नेफस्कून) का अध्यक्ष चन्द्र प्रसाद ढकालले दीप प्रज्वलन गरी कार्यक्रमको उद्घाटन गर्नुभएको थियो । अध्यक्ष ढकालले सहकारी संस्थाका समस्या समाधानका लागि सबै सहकारी एक ठाउँमा उभिनुपर्ने आवश्यकता औंल्याउनुभयो । उहाँले सहकारी संस्थालाई सुरक्षित राख्ने र बचतकर्ताहरूको बचत सुरक्षित राख्ने जिम्मेवारी नेफ्स्कूनको रहेको बताउनुभयो । 

जिल्ला बचत तथा ऋण सहकारी संघ लि. पर्साका अध्यक्ष हरेराम प्रसादको अध्यक्षतामा सम्पन्न यस छलफल कार्यक्रममा जिल्ला बचत संघ पर्साका वरिष्ठ उपाध्यक्ष जिष्णु बरालले शुभकामना मन्तव्य राख्नुभएको थियो । विशिष्ट अतिथिको रूपमा जिल्ला बचत संघ पर्साका पूर्व अध्यक्ष राजेश पण्डित, बिस्कोका अध्यक्ष डिल्ली बिक्रम कार्की लगायतले आ–आफ्नो सुझाव एवम् धारणा राख्नुभएको थियो ।