चन्द्रनिगाहपुर, रौतहट । रौतहट जिल्ला बचत तथा ऋण सहकारी संघ लि.को आयोजनामा सहकारीको अग्रभागमा कार्यरत कर्मचारी लक्षित बजार प्रतिनिधिहरुको क्षमता अभिवृद्धि तथा जाली नोट पहिचान सम्बन्धी तालिम सम्पन्न भएको छ । नेपाल बचत तथा ऋण केन्द्रीय सहकारी संघ लि.(नेफ्स्कून) को प्राविधिक सहजीकरण रहेको उक्त तालिममा जिल्लाका विभिन्न ३१ बचत तथा ऋण सहकारी संस्थाबाट ६३ जना कर्मचारीहरुको सहभागिता रहेको थियो ।  

शनिबार सम्पन्न तालिमको उद्घाटन संघका अध्यक्ष विभू पोखरेलको प्रमुखत्वमा भएको थियो भने समापन सत्रमा चन्द्रपुर नगरपालिकाका प्रमुख संजय काफ्लेको प्रमुख आतिथ्यता रहेको थियो । नगर प्रमुख काफ्ले ले सहकारीको विकास र विश्वासको वातावरण बनाउन महत्वपूर्ण भुमिका खेल्ने लक्षित कर्मचारीलाई तालिम प्रदान गरेकोमा संघलाई धन्यवाद प्रदान गर्नुको साथै यस्ता कार्यक्रममा पालिकाले सदैव सहयोग गर्ने प्रतिबद्धता जनाउनु भएको थियो ।

कार्यक्रममा सहभागीहरुले आ आफ्नो अनुभूति सुनाउँदै सहकारी शिक्षामा अग्र भागमा कार्यरत कर्मचारीहरुलाई उच्च प्राथमिकता दिन अनुरोध गर्नुभएको थियो । कार्यक्रमको सञ्चालन महासचिव देव बहादुर सापकोटाले गर्नुभएको थियो भने स्वागत सचिव वसन्त आचार्यले गर्नु भएको थियो ।

समापन कार्यक्रममा बचत संघका संस्थापक अध्यक्ष कालिन्दी घिमिरे, कोषाध्यक्ष नरेन्द्र राना, सञ्चालक दुर्गा आचार्य, दुर्गा दाहाल, कल्पना दाहाल, पदम पहाडीको उपस्थिति रहेको थियो ।

तालिमको सहजीकरण सहजकर्ता कृष्ण कान्त मिश्रले गर्नु भएको थियो । एक दिवसीय तालिम विहान १० बजेदेखि साँझ ६ बजेसम्म सञ्चालन भएको थियो । क्रियाशिल सहभागिताकाबीच सम्पन्न तालिम अत्यन्त उपयोगी, समयसान्दर्भिक र प्रभावकारी रहेको कर्मचारीहरुको अभिव्यक्ति रहेको थियो । तालिमका सहभागीहरुलाई संघद्वारा प्रमाणपत्र प्रदान गरिएको थियो ।