काठमाडौं । राष्ट्रिय सहकारी महासंघका पूर्व अध्यक्ष एवं पूर्वमन्त्री केशव बडाललाई नेफ्स्कूनमा स्वागत गरिएको छ । नेफ्स्कून केन्द्रीय कार्यालय, नयाँ बानेश्वरमा आज दिउसो संघका अध्यक्ष चन्द्र प्रसाद ढकाल, पदाधिकारी, सञ्चालक, बागमती प्रोस्कूनका अध्यक्ष, संघका प्रमुख कार्यकारी अधिकृत लगायतले पूर्व अध्यक्ष बडाललाई स्वागत गर्नुभएको हो । स्वागत साथै संक्षिप्त भेटका क्रममा सहकारीको समसामयिक वस्तुस्थिति, सहकारी नियमन प्राधिकरणद्वारा जारी मापदण्ड, २०८२ र यसले बचत ऋण सहकारी अभियानमा सृजना गरेको अन्यौलताका विषयमा छलफल भएको संघका अध्यक्ष ढकालले जानकारी गराउनुभयो ।

बचत तथा ऋणको मुख्य कारोबार गर्ने सहकारी संस्थाको सञ्चालन सम्बन्धमा राष्ट्रिय सहकारी नियमन प्राधिकरणद्वारा २०८२ जेठ ९ गते जारी नियामकीय मापदण्डप्रति बचत तथा ऋण सहकारी अभियानको तर्फबाट गम्भिर ध्यानाकर्षण भएको छ । जारी मापदण्डको विषयमा पूर्व अध्यक्ष बडालले सहकारीको सिद्धान्त र मूल्य मान्यता विपरित कानुनको खिलाफमा गएर मापदण्ड जारी गरिनु सहकारी अभियानमाथी राज्यको दमन भएको बताउनुभएको छ ।