रुपन्देही । लुम्बिनी प्रदेश बचत तथा ऋण सहकारी संघ लि.(लुस्कून) को आयोजन र नेफ्स्कूनको प्राविधिक सहजीकरणमा बुटवलमा एक दिवसीय 'साकोसमा महिला सशक्तिकरण' तालिम सम्पन्न भएको छ । तालिममा रुपन्देहीबाट ३२ जना, नवलपरासीबाट ८ जना, कपिलबस्तुबाट ३ जना, दाङबाट २ जना, गुल्मीबाट १ जना र बाँकेबाट एक जना गरि ४७ जना साकोसका महिला सञ्चालकहरुको सहभागिता रहेको थियो ।

लुम्बिनी प्रोस्कूनका अध्यक्ष कृष्ण नेपालको अध्यक्षतामा आयोजित उक्त तालिममा प्रोस्कूनका महासचिव बसन्त प्रसाद ढकाल, कोषाध्यक्ष  प्रेम गुरुङ, सञ्चालक निर्मला अधिकारी र उमा पोखरेलको उपस्थिति रहेको थियो । 

तालिमको सहजीकरण नेफ्स्कूनकी सञ्चालक ज्ञानु पौड्यालले गर्नुभएको थियो । उहाँले महिलाबिरुद्धका सबै प्रकारका बिभेद र हिंसाको अन्त्यगरी महिलाहरूको हक तथा अधिकारको सुरक्षा र प्रवर्दनको लागि राज्यद्वारा प्रदत्त अधिकार प्राप्तीका लागि अब हरेक महिला स्वयं जागरुक हुनुपर्नेमा जोड दिनुभएको थियो । महिला अधिकारका लागि सशक्त रुपमा अगाडि बढ्न अब महिलाहरुले आफूमा अन्तरनिहित क्षमताको विकासमा समेत ध्यानदिनुपर्ने उहाँको भनाई थियो । 

सहकारी संस्थाहरुमा महिलाको उपथिति पुरुषको भन्दा बढी छ, उहाँले भन्नुभयो, “अव ३३ प्रतिशत मात्र होइन, सहकारी क्षेत्र अर्थात अन्य निर्णायक तहमा अब महिलाको सहभागिता ५० प्रतिशत पुर्याउन पहल गर्नुपर्ने समय भएको छ ।” 

महिला सशक्तिकरणका लागि सर्वप्रथम महिलाहरुमा सचेतना जरुरी रहेको भन्दै उहाँले अव महिलाहरु उपस्थितिमा मात्र नभएर निर्णायक तहमा क्रियाशिल सहभागिताका लागि तयार रहन अनुरोध गर्नुभएको थियो ।  

शिक्षा उपसमिति संयोजक निर्मला अधिकारीको सञ्चालनमा भएको कार्यक्रममा महासचिव बसन्त ढकालले स्वागत मन्तव्य व्यक्त गर्नुभएको थियो भने व्यवस्थापक तारा अर्यालले तालिमको व्यवस्थापन गर्नुभएको थियो ।