इटहरी । आज विश्व वातावरण दिवस । “प्लास्टिक प्रदूषण न्यूनीकरणमा हाम्रो दायित्व’’  भन्ने मुल नाराका साथ विश्वभर मनाइरहेको वातावरण दिवसको अवसर पारेर सुनसरी, इटहरीस्थित महिला बचत तथा ऋण सहकारी संस्थाले वृक्षारोपण गरेको छ । महिला साकोसले विश्व वातावरण दिवसको अवसरमा हरेक वर्ष वृक्षारोपण गर्ने गरेको साकोसकी अध्यक्ष मुना प्रसाईं तिमसिनाले जानकारी गराउनुभयो । सुन्दरहैचा ४, मोरङ स्थित साकोसको आफ्नै जग्गामा गरिएको वृक्षारोपण कार्यक्रममा साकोसका सञ्चालक समिति, लेखा सुपरिवेक्षण समिति, विभिन्न उपसमिति, व्यवस्थापक लगायत कर्मचारीहरुको उपस्थिति रहेको थियो । 

“पर्यावरण तथा वातावरण जगेर्नाका लागि वृक्षारोपण गरौं, प्लास्टिकजन्य वस्तुको प्रयोग न्यूनीकरण गरौं” यसमा आत्मसात गर्दै कार्यक्रममा उपस्थित सम्पूर्णले आजैबाट प्लास्टिक प्रयोग सक्दो कम गर्ने विषयमा संयूक्त प्रण गर्नुभएको थियो । साथै संस्थाको कार्यालय सहित सेवाकेन्द्रमा उपस्थित सम्पूर्ण सदस्यज्यूहरुलाई कागती, लिची, अमला, अम्बक, धुपी, टिक, मसला, कटहर, बडहर, लटहर लगायत अन्य बिरुवा वितरण समेत गरिएको थियो ।

’प्लास्टिक प्रदूषण न्यूनीकरणमा हाम्रो दायित्व’ नारासहित यो वर्षको विश्व वातावरण दिवस विश्वव्यापी रुपमा विविध कार्यक्रम गरि मनाइँदै छ ।  संयुक्त राष्ट्रसङ्घको आह्वानमा सन् १९७३ देखि प्रत्येक वर्ष जुन ५ तारिखलाई विश्व वातावरण दिवसको रूपमा मनाउन थालिएको हो ।