सुनसरी । इटहरि १६ स्थित किसान कल्याण बचत तथा ऋण सहकारी संस्था लि.ले सामाजित उत्तरदायित्वपूर्ण कार्यक्रम अन्तर्गत विद्यार्थीहरु लक्षित लागुपदार्थ दुर्ब्यसनी विरुद्ध सचतेतनामुलक कार्यक्रम सञ्चालन गरेको छ । 

लागु औषध दुर्ब्यसन दिन प्रतिदिन बढिरहेको सन्दर्भमा २ ओटा विद्यालयका ३ सय भन्दा बढी विद्यार्थीहरूलाई सहभागी गराई सचेतनामुलक कार्यक्रम गरिएको साकोसले जनाएको छ । साकोसको युवा क्लव,  बराहक्षेत्र– ७ बाङ्गेको आयोजनामा सम्पन्न कार्यक्रममा संस्थाका अध्यक्ष शालिकराम ढकालको अध्यक्षता र बराहक्षेत्र वडा नं. ७ का वडा अध्यक्ष कपिल आचार्यको प्रमुख आतिथ्यता रहेको थियो । 

कार्यक्रममा इलाका प्रहरी कार्यालय महेन्द्रनगर, रक्षा फाउण्डेसन सुधार केन्द्र रामधुनी ३, फेलोसिप फाउण्डेसन इटहरी ५ र कुण्ड पुनर्जीवन केन्द्र इटहरी २० लगायतको सहजीकरण रहेको थियो । साकोसले वार्षिक कार्ययोजना अनुसार दर्जन भन्दा बढी सामाजिक कार्यक्रमहरू आयोजना गरेको थियो । सामाजिक सामुदायिक कार्यक्रमहरू व्यवस्थापन गर्न तथा युवा सेयर सदस्यहरूको नेतृत्व विकास गर्नका लागि ९ वटा युवाक्लब गठन गरि संचालन गरिरहेको छ । 

साकोसमा हाल २४ हजार ६०३ सदस्य, १ अर्व ४७ करोडको कुल सम्पति र ८ वटा सेवाकेन्द्रहरू सञ्चालनमा रहेको संस्थाका प्रमुख कार्यकारी अधिकृत पुस्कर बस्नेतले जानकारी दिनुभयो ।