काठमाडौं । नेपाल बचत तथा ऋण केन्द्रीय सहकारी संघ लि.(नेफ्स्कून) न्युरोड सदस्य सेवा कार्यालयको आयोजनामा संघमा आवद्ध सदस्य संस्थाहरुका लागि आधारभूत साकोस सञ्चालन तालिम प्रदान गरिएको छ । विहिबार सञ्चालित तालिमको मुख्य उद्देश्य दैनिक कार्यालय सञ्चालन, लेखा प्रणाली, वित्तीय व्यवस्थापन, साकोस सञ्चालनको कानुनी तथा नीतिगत पक्ष र सहकारी सिद्धान्तबारे आधारभूत ज्ञान प्रदान गर्नु रहेको थियो । तालिममा काठमाडौंका विभिन्न बचत तथा ऋण सहकारी संस्थाबाट गरि २६ जनाको सहभागिता रहेको थियो । 

तालिमको अध्यक्षता साथै उद्घाटन नेफ्स्कूनका सञ्चालक एवम् न्युरोड सदस्य सेवा कार्यालय व्यवस्थापन उपसमिति संयोजक खेमराज सुवेदीले गर्नु भएको थियो । तालिमको उद्देश्यमाथि प्रकाश पार्दै सञ्चालक सुवेदीले तालिमले सहकारीको प्रभावकारी सञ्चालन, कुशल व्यवस्थापन साथै कानुनी प्रक्रियाहरुबारे जानकार भई विद्यमान नीतिगत जटिलताहरुका सम्बन्धमा बुझेर कार्य गर्न सहज हुने बताउनुभयो । उहाँले आधारभूत साकोस सञ्चालन तालिमले संस्थाका कर्मचारीहरुलाई आन्तरिक रुपमा नियमित गरिरहेको कार्य लाई उत्कृष्ठ रुपमा सम्पादन गर्न सक्ने बनाउन सहयोग पुग्ने धारणा व्यक्त गर्नुभयो । 

व्यवस्थापनका मुख्य भुमिकामा रहेका व्यक्तित्वहरुको सहभागिता रहेको यस तालिमले हालको समस्यालाई के कसरी व्यवस्थापन गर्न सकिने र कानुनी झन्झटलाई सहज रुपमा कसरी संस्थालाई व्यवस्थापन गर्न सकिन्छ भन्ने विषयमा विशेष अन्तरक्रियात्मक छलफल विधिबाट तालिम सञ्चालन भएको थियो । तालिमको सहजीकरण नेफ्स्कूनका प्राचार्य बल्लभ तिमिल्सिनाले गर्नुभएको थियो । 

तालिम कार्यक्रम अत्यन्त समय सापेक्ष र उत्कृष्ठ रहेको विषयमा सहभागिहरुले सकारात्मक प्रतिक्रियाहरु व्यक्त गर्नुभएको थियो ।