भक्तपुर । सहकारीमा महिला नेतृत्व विकासका लागि तालिम तथा शिक्षाका कार्यक्रममा जोड दिइएको छ । भक्तपुर जिल्ला बचत तथा ऋण सहकारी संघ लि.को महिला सशक्तिकरण उपसमितिको आयोजना र नेफ्स्कूनको साझेदारीमा असार १४ गते, एक दिने “महिला नेतृत्व विकास तालिम सञ्चालन भएको हो । सहकारीमा महिला सदस्यकोे बहुमत भएतापनि नेतृत्व तहमा न्यून संख्या रहेको तथ्यांकले देखाउने भन्दै नेतृत्व तहमा महिलाको सहभागिता बढाउन सशक्तिकरणमा जोड दिनुपर्ने कार्यक्रममा उपस्थित सहभागी वक्ताहरुको भनाई रहेको थियो । 

सहकारीमा नेतृत्व गर्नलाई सहकारी मूल्य, मान्यता बुझ्नुको साथै सहकारी सम्बन्धी ऐन, नियमावली, मापदण्ड, संस्थाको विनियम, नीति, कार्यविधि सम्बन्धी जानकार हुनुपर्ने हुँदा तालिम आवश्यक रहेको र महिलाहरुले तालिम सँगसँगै अध्ययन र विश्लेषण पनि एकसाथ अगाडि बढाउनुपर्ने आवश्यकता औल्याईएको थियो । आफूमा स्वयम्सेवी भावनाको विकास साथै नेतृत्व क्षमता अभिवृद्धि गर्न सके नेतृत्व तहमा महिलाको संख्यात्मक सँगै गुणात्मक बृद्धि सम्भव रहेको विषय तालिममा प्रष्ट पारिएको थियो ।

तालिमको सहजीकरण नेफ्स्कूनकी तालिम अधिकृत रिता सुवेदीले गर्नुभएको थियो । कार्यक्रममा सभापति एवम् संघका संचालक सदस्य कृष्णश्वरी मचामसीले महिला नेतृत्व विकास तालिम, तालिम लिनका लागि मात्र नभई सहकारीको अध्यक्ष एक दिन बन्नेछु भन्ने बिचार लिएर जानुहुन सहभागीहरुलाई अनुरोध गर्नुभयो । साथै सहकारीमा नेतृत्व गर्ने सोचले नै उत्प्रेरित भएर नै तालिममा उत्साहजनक सहभागिता रहेको र सहकारी सम्बन्धी नीति, नियम, संस्थाकै विनियम, नीतिहरु अध्ययन गर्नुपर्ने अनिमात्र सहकारीको नेतृत्व सक्षम हुने विचार राख्नुभयो ।  

कार्यक्रममा महिला सशक्तिकरण उपसमितिका सदस्य निर्जना ढुंगेल दाहालले पनि तालिममा सिकेका कुराहरु संस्थामा गएर कार्यान्वयन गर्नुहुन अनुरोध गर्नुहुँदै अवसरकै कमीले गर्दा पनि महिला नेतृत्वमा कमी भएको विचार राख्ख्नुभयो । तालिममा सहभागीहरुमध्येबाट शुभेच्छा बचत तथा ऋण सहकारी संस्थाका मनशोभा सुवाल र अमरज्योति बचत तथा ऋण सहकारी संस्था लि.का सविता घिमिरेले पनि मन्तव्य राख्नुभएको थियो । 

तालिमको समापन संघका अध्यक्ष कृष्णगोविन्द लाखाजूले गर्नुभएको थियो भने कार्यक्रम सञ्चालन संघका अधिकृत कृष्णश्वरी ह्यौंमिखाले गर्नुभएको थियो । सो तालिममा संघमा आवद्ध सदस्यसंस्थाहरुबाट ४८ जनाको उपस्थिति रहेको थियो ।