राष्ट्रिय सहकारी महासंघले रिक्त रहेको महाप्रबन्धक पदमा वरिष्ठ अधिकृत गोपिकृष्ण भण्डारीलाई कायम मुकायम महाप्रबन्धकको रूपमा नियुक्त गरेको छ । नियुक्तिसँगै भण्डारीले शुक्रबार पदभार ग्रहण गर्नुभएको छ । महाप्रबन्धक सुरेश थापाले दिएको राजीनामा साउन १ गतेदेखि लागु हुने गरी महासंघको संचालक समितिले निर्णय गर्दै भण्डारीलाई अधिकतम ६ महिनाका लागि कायमम’कायम महाप्रबन्धको जिम्मेवारी दिने निर्णइ गरेको थियो । महासंघका अध्यक्ष ओमदेवी मल्लले महासंघको कर्मचारी प्रशासन कार्यविधि, २०७५ को दफा १९९१० बमोजिम भण्डारीलाई २०८१ साउन १ गतेदेखि लागू हुने गरी अधिकतम ६ महिनाका लागि यो जिम्मेवारी दिनुभएको हो । 

पदभार ग्रहण समारोहमा महासंघका वरिष्ठ उपाध्यक्ष डिवी बस्नेत, सञ्चालक सदस्यहरू काशीचन्द्र बरार र सुमन नेपाल लगायत अन्य पदाधिकारी तथा कर्मचारीको उपस्थिति थियो । अध्यक्ष मल्लले भण्डारीलाई औपचारिक रूपमा जिम्मेवारीको पत्र हस्तान्तरण गर्दै, नयाँ भूमिकामा सफल कार्यकालको शुभकामना दिनुभयो ।

नवनियुक्त महाप्रबन्धक भण्डारीले संस्थाको व्यवस्थापकीय कार्यदक्षता अभिवृद्धि गर्दै सहकारी क्षेत्रको मजबूतीका लागि आफू प्रतिबद्ध रहने प्रतिवद्धता व्यक्त गर्नुभएको छ ।