धनगढी । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को धनगढी सदस्य सेवा कार्यालय र कञ्चनपुर सेवा केन्द्रको संयुक्त आयोजनामा “सहकारीमा सम्पत्ति शुद्धिकरण निवारण तालिम” धनगढी, कैलालीमा सम्पन्न भएको छ ।

तालिमको उद्घाटन नेफ्स्कून सञ्चालक समिति सदस्य दिप्ती शाहीको अध्यक्षतामा भएको थियो। सहजीकरण तालिम विभागका प्राचार्य बल्लभ तिमल्सिनाले गर्नुभएको थियो। तालिममा सम्पत्ति शुद्धिकरणका चरणहरू, सहकारीमा जोखिमका सम्भावित माध्यमहरू र नियन्त्रणका उपायहरूबारे व्याख्या गरिएको थियो ।

सहकारी संस्थामा पारदर्शिता, सुशासन र वित्तीय अनुशासन कायम राख्न सम्पत्ति शुद्धिकरण निवारण तालिम आवश्यक रहेको छ। तालिमको मुख्य उद्देश्य सहकारीहरूमा अवैध धन भित्रिने सम्भावनाबारे चेतना अभिवृद्धि गर्नु, जोखिम व्यवस्थापनका उपायहरू सिकाउनु र सम्बन्धित कानुनी प्रावधानहरूको जानकारी दिनु रहेको थियो ।

सहजीकरणका क्रममा सम्पत्ति शुद्धिकरणको अर्थ, प्रक्रिया र सहकारी संस्थामार्फत कसरी अवैध सम्पत्ति भित्रिन सक्छ भन्ने विषयमा व्याख्या गरिएको थियो। साथै, अवैध क्रियाकलाप पहिचान गर्ने उपायहरू, सदस्यको पहिचान, संकास्पद कारोबारको रिपोर्टिङ प्रक्रिया र नियामक निकायहरूद्वारा तोकिएको मापदण्डहरूको जानकारी प्रदान गरेको थियो ।

नेपालको सम्पत्ति शुद्धिकरण निवारण ऐन, २०६४ अनुसार सहकारीहरू वित्तीय संस्था भएकाले ऐनको दायरामा पर्छन्। त्यसैले सम्पत्ति शुद्धिकरणको जोखिम न्यूनीकरण गर्न सहकारी सञ्चालक र कर्मचारीहरूलाई तालिम दिई सजग बनाउनु अत्यावश्यक मानिएको छ ।

धनगढी, कञ्चनपुर र डडेल्धुरा जिल्लाका विभिन्न साकोसका अध्यक्ष, सचिव, कोषाध्यक्ष, व्यवस्थापक, ऋण अधिकृत तथा शाखा प्रमुखहरू गरी ३५ भन्दा बढीको सहभागिता रहेको कार्यक्रमको सञ्चालन दिपकराज जोशी र व्यवस्थापन धर्मराज जोशीले गर्नुभएको थियो ।