काठमाडौं । क्रेडिट युनियन डिभेलपमेन्ट फाउन्डेशन नेपाल (कड्फन) कार्यसमितिको वैठक असोज ३१ गते शुक्रबार सम्पन्न भएको छ । नेफ्स्कूनका पूर्व अध्यक्ष एवं कड्फनका अध्यक्ष डी.बी. बस्नेतको अध्यक्षतामा आयोजित वैठक नेफ्स्कूनको नवनिर्मित भवनमा बसेको थियो । वैठकमा कार्यसमितिका पदाधिकारी र सदस्यहरु सहित ६ जनाको उपस्थिति रहेको थियो । बैठकले ७ सदस्यीय कार्यसमितिको संख्या थप गरी ९ सदस्यीय बनाउन आगामी साधारणसभाबाट अनुमोदन गराउने निर्णय गरेको छ । त्यसैगरी कड्फनको आगामी १८औँ साधारणसभा यही कार्तिक २८ गते गर्ने निर्णय समेत वैठकले गरेको छ ।

२०६८ सालमा दर्ता भएको ‘कड्फन’ राष्ट्रिय स्तरको गैरनाफामूलक संस्था हो । नेपालको बचत तथा ऋण सहकारी अभियानको सबलीकरण एवम् सशक्तिकरणमा टेवा पुर्याउने उद्देश्यका साथ गठन गरिएको राष्ट्रिय स्तरको गैरनाफामूलक संस्था कड्फनलाई क्रियाशील बनाउने र प्रभावकारिता वृद्धि गर्ने सम्बन्धमा गहन निर्णयहरु वैठकले गरेको छ । कड्फनलाई जीवन्त बनाउन र यसको दायरा फराकिलो बनाउन नेफ्स्कूनका पूर्व तथा वहालवाला कर्मचारीहरुको समेत सहभागिता बढाउनुपर्ने विषयमा अध्यक्ष बस्नेतले आफ्नो धारणा राख्नुभएको थियो । त्यसैगरि ७५ वर्षभन्दा माथि उमेर समुहका सदस्यहरुलाई मानार्थ सदस्यमा राख्ने निर्णय वैठकले गरेको छ । कड्फन सञ्चालन समितिमा नेफ्स्कूनका सञ्चालक समिति, लेखा सुपरिवेक्षण समितिका पदाधिकारीहरु, प्रमुख  कार्यकारी अधिकृत साथै पूर्व संचालकहरू पूर्व लेखा सुपरिवेक्षण समिति र पूर्व प्रमुख कार्यकारी अधिकृतहरु सदस्य रहन सक्ने व्यवस्था विधानमा उल्लेख छ । कड्फन समग्र साकोस अभियान र नेफ्स्कूनको सहयोगी संस्थाको रुपमा रहँदै वित्तीय सहकारी अभियानको रक्षकवच बन्ने विश्वास व्यक्त गरिएको छ । 
 
२०८१ पुस १८ गते सम्पन्न १७औं वार्षिक साधारणसभाले नेफ्स्कूनका पूर्व अध्यक्ष डिबी बस्नेतको अध्यक्षतामा आगामी २ वर्षका लागि नयाँ सञ्चालक समिति सर्वसम्मत निर्वाचित गरेको थियो ।  कड्फनको वर्तमान सञ्चालक समितिको उपाध्यक्षमा संघका पूर्व सञ्चालक श्याम बहादुर श्रेष्ठ, सचिवमा पूर्व कोषाध्यक्ष दीपक पनेरु, कोषाध्यक्षमा संघका पूर्व का.मु. प्रमुख कार्यकारी अधिकृत शिव अधिकारी र सञ्चालक सदस्यहरुमा पूर्व लेखा सुपरिवेक्षण समिति संयोजक अर्जुन पुडासैनी, पूर्व सञ्चालक न्हुच्छेनारायण श्रेष्ठ र लेखा सुपरिवेक्षण समिति सदस्य शुभद्रादेवी महतो निर्वाचित हुनुभएको थियो । यस वैठकमा नेफ्स्कूनको व्यवस्थापनबाट बरिष्ठ अधिकृत नविन राज दाहाल, अधिकृत रिता सुवेदी र अधिकृत राधा पौडेलको समेत उपस्थिती रहेको थियो ।