बैतडी । नेपाल बचत तथा ऋण केन्द्रीय सहकारी संघ लिमिटेड (नेफ्स्कून) संग सुदुरपश्चिम प्रदेश,बैतडी जिल्लाका दुई साकोस आबद्ध भएका छन् । 

जगन्नाथ महिला बचत तथा ऋण सहकारी संस्था लिमिटेड बैतडी र जीवनज्योती बचत तथा ऋण सहकारी संस्था लिमिटेड सुदुरपश्चिम प्रदेश बैतडी जिल्ला नियमित निरिक्षण अनुगमन कार्यक्रम (स्क्यान) मा कार्तिक २१ गते आबद्ध भएका हुन् । 

संघले आबद्ध सदस्य संघ संस्थाहरुको नियमित रुपमा निरिक्षण तथा अनुगमन गरी जोखीमको स्तर निर्धारण,जोखिम व्यवस्थापन र गुणस्तर सुनिश्चित गर्न विगतका वर्षहरुमा सञ्चालित एक्सेस,प्रोवेसन,तथा कव्स कार्यक्रमको सिकाइका आधारमा विकास गरिएको कार्यक्रम स्क्यानले आबद्ध सबै संस्थालाई अनुगमन सुपरिवेक्षण गर्ने लक्ष्य राखेको छ । 

नेफ्स्कून डडेल्धुरा सेवाकेन्द्र कार्यालय ईन्चार्ज योगेश बोहरा,जगन्नाथ महिला साकोसका व्यवस्थापक दुर्गा ठगुन्नाको रोहबरमा प्रथम पक्ष संघको तर्फबाट कार्यक्रम अधिकृत प्रविण अधिकारी र दोस्रो पक्ष साकोसको तर्फबाट अध्यक्ष नन्दा देबि पालको हस्ताक्षरमा दुई पक्ष बीच सम्झौता सम्पन्न भएको थियो । 

नेफ्स्कून डडेल्धुरा सेवाकेन्द्र कार्यालय ईन्चार्ज योगेश बोहरा,जीवनज्योती साकोसका प्रमुख कार्यकारी अधिकृत टेकराज लेखकको रोहबरमा प्रथम पक्ष संघको तर्फबाट कार्यक्रम अधिकृत प्रविण अधिकारी र दोस्रो पक्ष साकोसको तर्फबाट अध्यक्ष लोकेशलाल शाहको हस्ताक्षरमा दुई पक्ष बीच सम्झौता सम्पन्न भएको थियो । 

सहकारी ऐन २०७४ को व्यवस्था बमोजिम संघद्धारा यो कार्यक्रमको शुरुवात गरिएको थियो । यस कार्यक्रमले संघका सबै सदस्य संघ संस्थाहरुलाई अनुगमन तथा निरिक्षण गरी आवश्यक मार्गदर्शन प्रदान गर्ने उद्देश्य राखेको छ ।