नवलपुर । बागेश्वरी महिला बचत तथा ऋण सहकारी संस्था लिमिटेड हेटौडा नगरपालिका ११, नवलपुरको नेपाल बचत तथा ऋण केन्द्रीय सहकारी संघ लि. (नेफ्स्कून) द्धारा सञ्चालित स्क्यान कार्यक्रम अन्तर्गत नियमित परिक्षण पूर्ण तथा व्यवसायिक साकोस विकास कार्यक्रमको स्थलगत सुपरिवेक्षण कार्यक्रम मंसिर १३ गते सम्पन्न भएको छ । 

सुपरिवेक्षणको उद्देश्य सहकारीहरूलाई राज्य तथा नियामक निकायसँग समन्वय गर्दै नीति, निर्देशिका, मापदण्ड र कार्यविधिको प्रभावकारी कार्यान्वयनमा सक्षम बनाउनु, सदस्यहरूको आर्थिक सशक्तिकरणलाई प्रोत्साहन गर्नु र बचतकर्तामा विश्वास अभिवृद्धि गर्नु रहेको छ। निरीक्षणमा संस्थाको शेयर, बचत तथा ऋण व्यवस्थापन, सदस्यता प्रणाली, आन्तरिक सुशासन, लेखा प्रणाली, सूचना प्रविधि, सुरक्षण, MIS अद्यावधिक, सम्पत्ति शुद्धिकरण निवारण नीति (AML/CFT) र भाखा नाघेका ऋण असुलीका विषयहरू मूल्यांकन गरिएको थियो।

नेफ्स्कूनका तर्फबाट कार्यक्रम अधिकृत सोविता मैनाली र चितवन सदस्य सेवा कार्यालयका अनुगमन सहजकर्ता सुरेन्द्र श्रेष्ठ, संस्थाको तर्फबाट अध्यक्ष आशा कुमारी अधिकारी, प्रमुख कार्यकारी अधिकृत शर्मिला श्रेष्ठ, व्यवस्थापक उर्मिला ज्ञवाली, संचालक समितिका पदाधिकारीहरु र लेखा सुपरिवेक्षण समितिका पदाधिकारीहरु  लगायत अन्य तहका कर्मचारीहरुको सहभागीता रहेको थियो ।