पोखरा । पोखरा रोयल साकोसको समन्वयमा पोखरा १०, रामबजारमा रहेको कालिका मा.वि.को कक्षा ९ मा अध्ययनरत ५० जना विद्यार्थीहरुलाई पढ्दै कमाउँदै भन्ने व्यवहारिक शिक्षा प्रदान गरिएको छ । अफ्लातुन अन्तर्राष्ट्रिय र नेपाल बचत तथा ऋण केन्द्रीय सहकारी संघ लिमिटेड (नेफ्स्कून) को संयुक्त साझेदारीमा बालबालिकाहरुमा उद्यमशील, सामाजिक तथा वित्तीय शिक्षा कार्यक्रम सञ्चालन गरेको हो ।

शिक्षाले सदैव समाजमा आर्थिक र सामाजिक विषयमा सुधार गर्दै बालबालिका र युवाको क्षितिजलाई फराकिलो बनाउँन सहयोग गर्छ । यस सन्दर्भमा नेफ्स्कूनले बालबालिकामा जीवनोपयोगी सिप, अधिकार, लैङ्गिकता, उद्यम र वचत तथा भविष्यको योजनाजस्ता विषयहरु समेटिएको अफ्लाटुनसँगको प्राविधिक सहयोगमा कार्यक्रम कार्यान्वयन गरिरहेको छ । यो कार्यक्रमले विद्यालय शिक्षाको सान्दर्भिकता बढाउने मात्र नभई शिक्षाले समाज रुपान्तरणमा निर्वाह गर्ने भूमिकालाई प्रष्ट बनाउनेछ । यस शिक्षा मार्फत पढदै कमाउँदै भन्ने अभ्यासलाई उजागर गर्छ । यो सानो उमेर देखि स्वाबलम्बी र आत्मानिर्भर हुनुपर्छ भन्ने सिकाई र खेलमार्फत प्रदान गरिने शिक्षा हो । पोखरा रोयल साकोसको समन्वयमा पुस १३ गते आयोजित कार्यक्रमको सहजीकरण साकोसका प्रमुख कार्यकारी अधिकृत भिम गुरुङ र नेफ्स्कूनका कार्यक्रम अधिकृत राधा पौडेलले गर्नुभएको थियो । 

कार्यक्रमको प्रथम चरणमा अफलातुन इन्टरनेशनलको युवा तथा बालबालिकाहरुमा सामाजिक तथा वित्तीय शिक्षा अन्तर्गत पढ्दै कमाउँदै भन्ने कार्यक्रमको अवधारणा सम्बन्धमा अन्तरक्रिया गरिएको थियो भने दोस्रो चरणमा कक्षा ९ मा अध्ययनरत विद्यार्थीहरुलाई जीवनोपयोगी सिप, अधिकार, लैङ्गिकता, उद्यम र वचत तथा भविष्यको योजनाजस्ता विषयहरुको अवधारणात्मक ज्ञान प्रदान गरिएको थियो ।