काठमाडौं । कर्जा सूचना केन्द्रले सञ्चालनमा ल्याएको सदस्यता संस्था दर्ता प्रणाली मार्फत बचत तथा ऋणको मुख्य कारोबार गर्ने सहकारी संस्थाहरूले सदस्यता प्राप्त गर्न थालेका छन्।

सोही क्रममा ललितपुरको लगनखेल स्थित मुख्य कार्यालय रहेको हाम्रो बचत तथा ऋण सहकारी संस्था, काभ्रेको ज्योति मिर्मिरे सामूहिक साकोस र विन्दवासिनी साकोस, मोरङको मनकामना साकोस, रुपन्देहीको जनउत्थान साकोस र सुर्खेत स्थित विरेन्द्रनगर साकोसले कर्जा सूचना केन्द्रको सदस्यता लिएका छन्। 

केन्द्रले आइतबार हाम्रो साकोस सदस्यता नम्बर ०१, विरेन्द्रगर साकोस सदस्यता नम्बर ११ प्रदान गरेको हो भने ज्योति मिर्मिरे साकोसले सदस्यता नम्बर २ र विन्दवासिनी साकोसले नम्बर ८ प्राप्त गरेका छन्।

अनलाइन आवेदन पेश गर्दा कर्जा सूचना केन्द्र लिमिटेडलाई सम्बोधन गरिएको आवेदन पत्र, सञ्चालक समितिको निर्णय र स्वीकृति पत्र, राष्ट्रिय सहकारी नियमन प्राधिकरण (NCRA) को दर्ता पत्र, सहकारी दर्ता प्रमाणपत्र तथा PAN दर्ता प्रमाणपत्र अनिवार्य रूपमा संलग्न गर्नुपर्ने केन्द्रले जनाएको छ ।

अनलाइन प्रणाली सदस्यता दर्ताका लागि मात्र प्रयोग हुने केन्द्रले स्पष्ट पारेको छ। कर्जा सूचना प्रतिवेदन उत्पादन, कालोसूचीकरण वा अन्य सेवा प्रयोजनका लागि यो प्रणाली प्रयोग नहुने केन्द्रले स्पष्ट पारेको छ।

कर्जा सूचना केन्द्रको सदस्यता प्राप्त गरेसँगै सहकारी क्षेत्रमा पारदर्शिता, कर्जा अनुशासन, जोखिम व्यवस्थापन तथा दोहोरो कर्जा न्यूनीकरणमा महत्वपूर्ण सहयोग पुग्ने विश्वास गरिएको छ।