काभ्रेपलाञ्चोक । नयाँपाटी बचत तथा ऋण सहकारी संस्था लि. को नेतृत्व टिमले लीडरशिप बूटक्याम्पबाट द लीडरशिफ्टको सिद्धान्तमा आधारित रूपान्तरणकारी प्रशिक्षण प्राप्त गरेका छन् ।

माघ १६ देखि १८ सम्म काभ्रेपलाञ्चोकको बल्थलीमा उक्त कार्यक्रमको आयोजना गरिएको थियो । कार्यक्रमको समुद्घाटन संस्थाको अध्यक्ष श्याम कृष्ण श्रेष्ठको अध्यक्षतामा संस्थाका प्रमुख सल्लाहकार गौतम खनालको प्रमुख आतिथ्यतामा भएको थियो । 

कार्यक्रममा प्रमुख अतिथिले बूटक्याम्प केवल ज्ञान साट्ने फोरम होइन, एउटा संकल्पको सुरुवात हुने र नयाँपाटी साकोसका नेताहरूमा असाध्यै उत्सुकता, सिक्ने इच्छा र आफूलाई परिवर्तन गर्ने साहस देखेको कुरामा जोड दिदैँ  नेतृत्वमा म को सट्टा हामी को स्वर बलियो हुने साथै के भयो को सट्टा के सम्भव को चिन्तन हुने र समस्याको सट्टा सम्भावनाको दृष्टि विकसित हुदैँ  यिनै नयाँ मानसिकताले संस्थालाई अगाडि बढाउने कुरामा विश्वास व्यक्त गर्नुभयो ।

कार्यक्रममा संस्थाको सञ्चालक समिति, लेखा सुपरिवेक्षण समिति, उपसमिति र उच्च व्यवस्थापन सहित २४ जनाको सहभागीता रहेको थियो । 

सहभागीहरूले यस कार्यक्रमलाई संस्थाको मानव संशाधन विकासको एक महत्वपूर्ण ईंटा भएको बताउँदै हाम्रो नेतृत्व टिमले प्राप्त गरेको यो अद्यावधिक ज्ञान र कौशलले हाम्रो संस्थालाई नयाँ सीप र गति प्रदान गर्नेछ । हामी सेवा गुणस्तर, रणनीतिक योजना र साझेदारहरूप्रतिको मूल्य सिर्जनामा यसबाट ठूलो फाइदा लिने र प्रशिक्षणलाई अत्यन्त प्रेरणादायी र व्यवहारिक बताउँदै, पुरानो सोचाई र व्यवहार परिवर्तन गर्ने चुनौती र अवसर दुवैबारे गहन चिन्तन गर्न पाएको उल्लेख गर्नुभएको छ  ।  समूहमा कार्य गर्दा सशक्तिकरण, नवाचारलाई प्रोत्साहन र दीर्घकालीन वृद्धिमा ध्यान केन्द्रित गर्ने महत्व मनमा बसेको र बूटक्याम्पबाट प्राप्त ज्ञान र सिकाइलाई संस्थाको रणनीतिक योजनाहरूमा समेट्ने, टोली प्रबन्धन प्रक्रियामा एकात्मकता ल्याउने  र संस्थालाई एउटा निरन्तर सिक्ने र अनुकूलन गर्ने संगठन बनाउने संकल्प सहित कार्यक्रम सम्पन्न भएको छ । 

कार्यक्रमको सहजीकरण संघका वरिष्ठ अधिकृत प्रेमनाथ वाग्ले र तालिम अधिकृत उमेश कोइरालाले गर्नुभएको थियो ।