नेपाल बचत तथा ऋण केन्द्रीय सहकारी संघ लिमिटेड (नेफ्स्कून) खैरेनिटार सेवा केन्द्रको आयोजनामा अग्रभागका कर्मचारीहरूको क्षमता विकास तालिम माघ २६ गते सम्पन्न भएको छ ।

माघ २५ र २६ दुई दिवसीय तालिमको उद्देश्य सहकारी तथा वित्तीय संस्थामा कार्यरत अग्रभागका कर्मचारीहरूको पेशागत क्षमता विकास गर्नु रहेको छ  । अग्रभागका कर्मचारीहरू संस्थाको पहिलो सम्पर्क बिन्दु हुने भएकाले सदस्यसँग हुने व्यवहार, संवाद शैली र सेवा प्रवाहले संस्थाप्रति सदस्यको धारणा निर्माण गर्दछ ।

दमौली, ब्यास नगरपालिकामा सञ्चालन गरिएको कार्यक्रममा विभिन्न सहकारी तथा वित्तीय संस्थामा कार्यरत २६ जना अग्रभागका कर्मचारीहरूको सहभागिता रहेको थियो ।

तालिममा अग्रभागका कर्मचारीहरूको भूमिका, सदस्यसँगको व्यवहार, प्रभावकारी सञ्चार सीप, सेवा प्रवाहमा शिष्टता र संस्थागत विश्वास अभिवृद्धि गर्ने विषयहरूमा केन्द्रित रहेर प्रशिक्षण प्रदान गरिएको थियो । सहभागीहरूले तालिमबाट आफ्नो पेशागत क्षमता वृद्धि भएको तथा दैनिक कार्यमा उपयोगी ज्ञान प्राप्त भएको प्रतिक्रिया दिएका छन् ।

कार्यक्रमको व्यवस्थापन दिपक आचार्य र गौरव पौड्यालद्वारा गरिएको थियो । नेफ्स्कूनका कार्यक्रम अधिकृत मनोज खड्काले तालिमको सहजीकरण गर्नुभएको यस तालिमले सहकारी तथा वित्तीय संस्थामा सेवा प्रवाहको गुणस्तर सुधार गर्नुका साथै सदस्य सन्तुष्टि बढाउन महत्वपूर्ण भूमिका खेल्ने अपेक्षा गरिएको छ ।