अछाम — तुर्माखाँद गाउँपालिका–३ स्थित चेतना बचत तथा ऋण सहकारी संस्था लिमिटेड नेपाल बचत तथा ऋण केन्द्रीय सहकारी संघ लि. (नेफ्स्कून) ले सञ्चालन गरेको नियमित निरीक्षण तथा अनुगमन (स्क्यान) कार्यक्रममा आबद्ध हुने अछामकै पहिलो सहकारी बनेको छ ।

सुर्खेत सदस्य सेवा कार्यालय अन्तर्गत चेतना साकोसले उक्त कार्यक्रममा सहभागिता जनाएको हो । वैशाख ५ गते सम्पन्न सम्झौतापछि अब संघले संस्थाको स्तरीकरणका लागि बचत, ऋण, ब्याजदर, वार्षिक योजना, सम्पत्ति शुद्धीकरण निवारण नीतिको पालना, नियामकीय निर्देशनको कार्यान्वयन तथा भाखा नाघेको ऋण असुली लगायत विषयमा नियमित सुपरिवेक्षण गर्नेछ ।

संघको ३८औं स्थापना दिवसको अवसरमा सार्वजनिक भएको स्क्यान कार्यक्रमले सदस्य साकोसको अनुगमन, निरीक्षण तथा आवश्यक मार्गदर्शन प्रदान गर्ने लक्ष्य राखेको छ । संघले सहकारी ऐन २०७४ अनुसार कार्यक्रम सञ्चालनमा ल्याएको हो ।

सम्झौता कार्यक्रममा चेतना साकोसका अध्यक्ष नरबहादुर बि.सी., व्यवस्थापक खडक बि.सी., लेखापाल जगत बि.सी. तथा नेफ्स्कून बाँके सदस्य सेवा कार्यालयका अनुगमन सहजकर्ता प्रकाश लुहारको उपस्थिति रहेको थियो ।