काठमाडौं । समस्याग्रस्त सहकारी व्यवस्थापन समिति ले समस्याग्रस्त सहकारी संस्थासँग सम्बन्धित ऋण नतिर्ने सञ्चालक, सदस्य, व्यवस्थापक र ऋणीहरूलाई १५ दिनभित्र ऋण तिर्न सूचना जारी गरेको छ ।

भूमि व्यवस्था, सहकारी तथा गरिबी निवारण मन्त्रालय अन्तर्गत रहेको समितिले मंगलबार सूचना प्रकाशित गर्दै पटक–पटक जानकारी गराउँदा पनि ऋण नतिर्नेहरूलाई अन्तिम अवसर दिइएको जनाएको हो ।

सूचनाअनुसार सम्बन्धित सहकारीका सञ्चालक, सदस्य, कर्मचारी तथा ऋणीहरूले सावाँ, ब्याज र जरिवानासहितको रकम समितिको कार्यालय, बबरमहल, काठमाडौंमा बुझाउनुपर्नेछ ।

समितिले तोकिएको १५ दिनभित्र ऋण नतिरेमा कडा कारबाही गरिने चेतावनी दिएको छ । त्यस्तो अवस्थामा ऋणीहरूको नाम सार्वजनिक गरिने, धितो तथा सम्पत्ति लिलामी प्रक्रिया अघि बढाइने तथा सार्वजनिक सेवा सुविधामा समेत रोक लगाउन सम्बन्धित निकायमा सिफारिस गरिने उल्लेख छ ।

२० वटा समस्याग्रस्त सहकारी संस्थाहरूको नाम र घोषणा मिति समेत सार्वजनिक गरिएको छ । समितिले सहकारी ऐन, २०७४ तथा नियमावली, २०७५ अनुसार थप कानुनी प्रक्रिया अघि बढाइने जनाएको छ ।