काठमाडौं । नेपाल बचत तथा ऋण केन्द्रीय सहकारी संघ लि. (नेफ्स्कून) ले राष्ट्रिय सहकारी बैंक लि.का नवनिर्वाचित सञ्चालक समिति तथा लेखा सुपरिवेक्षण समितिका पदाधिकारीलाई स्वागत तथा शुभकामना व्यक्त गरेको छ । 

सहकारी अभियानका दुई प्रमुख संस्थाबीचको अन्तरसहकार्यलाई थप सुदृढ बनाउने उद्देश्यसहित संघको केन्द्रीय कार्यालयमा आयोजित कार्यक्रममा नवनिर्वाचित नेतृत्वलाई औपचारिक रूपमा स्वागत गरिएको हो ।

असार २६ गते आयोजित कार्यक्रममा राष्ट्रिय सहकारी बैंकका नवनिर्वाचित अध्यक्ष लक्ष्मीप्रसाद पोखरेल, सञ्चालक समिति, लेखा सुपरिवेक्षण समितिका संयोजक तथा सम्पूर्ण नवनिर्वाचित पदाधिकारीलाई नेफ्स्कूनले सामूहिक रूपमा स्वागत गर्दै सफल कार्यकालको शुभकामना व्यक्त गरेको थियो ।

राष्ट्रिय सहकारी बैंकको २०८३ जेठ ९ गते सम्पन्न निर्वाचनअन्तर्गत सातमध्ये छ प्रदेशबाट सञ्चालकहरू सर्वसम्मत निर्वाचित हुनुभएको थियो भने बागमती प्रदेशबाट निर्वाचन मार्फत परितोष पौड्याल सञ्चालकमा निर्वाचित हुनुभएको थियो ।  

नेफ्स्कूनका अध्यक्ष चन्द्रप्रसाद ढकालको अध्यक्षतामा सम्पन्न कार्यक्रममा वरिष्ठ उपाध्यक्ष, उपाध्यक्ष, महासचिव, कोषाध्यक्ष, सञ्चालक सदस्य, प्रमुख कार्यकारी अधिकृत डा. शिवजी सापकोटा तथा संघका उच्च व्यवस्थापनको उपस्थिति रहेको थियो ।

कार्यक्रममा स्वागत मन्तव्य व्यक्त गर्दै नेफ्स्कूनका महासचिव घनश्याम अधिकारीले नेपालको सहकारी अभियानका दुई महत्वपूर्ण संस्था नेफ्स्कून र राष्ट्रिय सहकारी बैंकले सहकारी क्षेत्रको सुदृढीकरणमा महत्वपूर्ण भूमिका निर्वाह गर्दै आएको उल्लेख गर्नुभयो । सहकारी क्षेत्रमा देखिएका चुनौतीहरूको सामूहिक रूपमा सामना गर्दै संस्थागत सहकार्यलाई अझ प्रभावकारी बनाउने आवश्यकता रहेको उहाँको भनाइ थियो । नवनिर्वाचित नेतृत्वसँगको यो भेटघाटले आगामी सहकार्यलाई थप प्रगाढ बनाउने विश्वास पनि व्यक्त गर्नुभएको थियो । 

वरिष्ठ उपाध्यक्ष दामोदर अधिकारीले नेफ्स्कून नेपालको बचत तथा ऋण सहकारी अभियानको सबैभन्दा पुरानो केन्द्रीय संघ भएको र अभियानको आवश्यकताअनुसार राष्ट्रिय सहकारी बैंकको स्थापना भएको स्मरण गराउँदै दुवै संस्था अन्तरसहकार्यको सिद्धान्तअनुसार एकअर्काका परिपूरकका रूपमा कार्य गर्दै आएको बताउनुभयो । आगामी दिनमा पनि हातेमालो गर्दै सहकारी अभियानलाई अझ सबल र प्रभावकारी बनाउने प्रतिबद्धता व्यक्त गर्नुभएको थियो ।

प्रमुख कार्यकारी अधिकृत डा. शिवजी सापकोटाले नवनिर्वाचित नेतृत्वलाई स्वागत गर्ने परम्पराअनुसार कार्यक्रम आयोजना गरिएको जानकारी दिनुभयो । उहाँले नेफ्स्कून र राष्ट्रिय सहकारी बैंकले राष्ट्रिय तथा अन्तर्राष्ट्रिय स्तरमा सहकार्य गर्दै साकोस अभियानको विकास, क्षमता अभिवृद्धि तथा अन्तर्राष्ट्रिय सहकारी सम्बन्ध विस्तारमा उल्लेखनीय योगदान पु¥याएको बताउनुभयो ।  सहकारी संस्थाहरूलाई वित्तीय संकटबाट जोगाउन, संस्थागत सुदृढीकरण गर्न तथा नियामकीय अनुकूलनका लागि दुवै संस्थाबीच निरन्तर सहकार्य भइरहेको उहाँको भनाइ थियो ।

राष्ट्रिय सहकारी बैंकका अध्यक्ष लक्ष्मीप्रसाद पोखरेलले नेफ्स्कून परिवारबाट प्राप्त आत्मीय स्वागत, सम्मान र सद्भावप्रति राष्ट्रिय सहकारी बैंकको तर्फबाट आभार व्यक्त गर्नुभयो । बैंक स्थापना भएदेखि नै नेफ्स्कूनसँग सहकार्य गर्दै आएको उल्लेख गर्दै उहाँले आगामी दिनमा कानुनले निर्धारण गरेका आ–आफ्ना कार्यक्षेत्रभित्र रही अझ व्यवस्थित, प्रभावकारी र परिणाममुखी सहकार्यलाई निरन्तरता दिने प्रतिबद्धता व्यक्त गर्नुभयो ।

कार्यक्रमको अध्यक्षीय मन्तव्यमा नेफ्स्कूनका अध्यक्ष चन्द्रप्रसाद ढकालले नेफ्स्कून र राष्ट्रिय सहकारी बैंकमा आबद्ध अधिकांश सदस्य संस्थाहरू साझा रहेको उल्लेख गर्दै सहकारी क्षेत्रको सुशासन, सदस्य शिक्षा, वित्तीय अनुशासन र संस्थागत उत्तरदायित्व प्रवद्र्धनमा दुवै संस्थाले महत्वपूर्ण भूमिका निर्वाह गरिरहेको बताउनुभयो । सहकारी क्षेत्रमा देखिएका चुनौतीहरूको समाधानका लागि संस्थागत क्षमता अभिवृद्धि, सुशासन र सदस्यकेन्द्रित व्यवस्थापनलाई अझ प्रभावकारी बनाउनुपर्नेमा जोड दिनुभयो ।

अध्यक्ष ढकालले नेफ्स्कून तथा राष्ट्रिय सहकारी बैंकसँग आबद्ध अधिकांश सहकारी संस्थामा तुलनात्मक रूपमा समस्या कम देखिनुको कारण नियमित सुपरिवेक्षण, क्षमता विकास, संस्थागत अनुशासन तथा सहकार्यको अभ्यास रहेको उल्लेख गर्दै नवनिर्वाचित सञ्चालक समिति तथा लेखा सुपरिवेक्षण समितिलाई सफल कार्यकालको शुभकामना व्यक्त गर्दै नेपालको सहकारी अभियानका दुई महत्वपूर्ण संस्थाबीचको दीर्घकालीन सहकार्य, साझा जिम्मेवारी र संस्थागत एकतालाई थप मजबुत बनाउने विश्वास  सहित कार्यक्रम सम्पन्न भएको थियो ।