सुनसरी । सुनसरी स्थित श्री जनकल्याण बचत तथा ऋण सहकारी संस्था लिमिटेड को आयोजना नेफ्स्कूनको प्राविधिक सहयोग तथा डि.एस.आई.के. जर्मनीको प्राविधिक सहयोगमा दुईदिने बचत खेल तालिम सम्पन्न भएको छ ।

भाद्र ०३ र ०४ गते दुइ दिनसम्म सञ्चालित तालिममा खेलमा आधारित सिकाइ विधिमार्फत सहभागीहरूलाई पारिवारिक आय–व्यय व्यवस्थापन, बजेट निर्माण, आवश्यकता र चाहनाबीचको फरक, वित्तीय लक्ष्य निर्धारण, नियमित बचत, जिम्मेवार ऋण प्रयोग, ब्याज तथा मुद्रास्फीतिको प्रभाव, वित्तीय जोखिम व्यवस्थापन र सुरक्षित वित्तीय संस्थाको प्रयोगसम्बन्धी विषयमा व्यावहारिक ज्ञान तथा सीप प्रदान गरिएको थियो ।

तालिमका क्रममा सहभागीहरूले विभिन्न पारिवारिक तथा वित्तीय परिस्थितिमा समूहगत रूपमा निर्णय लिँदै ती निर्णयले परिवारको आय, खर्च, बचत तथा जीवनस्तरमा पार्ने प्रभावको विश्लेषण गरेका थिए । तीन चरणमा सञ्चालन गरिएको बचत खेलमार्फत सहभागीहरूले योजनाबद्ध बचत, सोचविचारपूर्वक खर्च, जिम्मेवार वित्तीय निर्णय तथा दीर्घकालीन वित्तीय सुरक्षाको महत्वबारे व्यावहारिक रूपमा सिक्ने अवसर प्राप्त गरेका थिए ।

तालिमको सहजीकरण नेफ्स्कूनका अधिकृत राम प्रसाद सापकोटा र शौभाग्य भट्टराईले गर्नुभएको थियो । तालिम पश्चात् सहभागीहरूले बचत खेल तालिमलाई रोचक, सहभागितामूलक तथा दैनिक जीवनमा प्रत्यक्ष रूपमा लागू गर्न सकिने उपयोगी सिकाइका रूपमा लिएका थिए । खेलका माध्यमबाट आय–व्ययको योजना बनाउने, आवश्यक र अनावश्यक खर्च छुट्याउने, नियमित बचत गर्ने तथा आकस्मिक अवस्थाका लागि वित्तीय तयारी गर्ने विषयहरू सहज र प्रभावकारी रूपमा बुझ्न सहयोग पुगेको बताएका थिए ।