काठमाडौं । एशियाली ऋण महासंघ (अकू) को ४५औँ साधारण सभाले सन् २०२६ देखि २०२८ सम्मका लागि नयाँ सञ्चालक समिति निर्वाचित गरेको छ । मलेसियाको क्वालालम्पुरमा आज सम्पन्न महासंघको वार्षिक साधारण सभाबाट नेपाल बचत तथा ऋण केन्द्रीय सहकारी संघ लिमिटेड (नेफ्स्कून) का अध्यक्ष चन्द्रप्रसाद ढकाल नेपालबाट सञ्चालकमा निर्वाचित हुनुभएको छ ।

नेपालको तथा बचत तथा ऋण सहकारी अभियानको प्रतिनिधित्व गर्दै अकूको सञ्चालक समितिमा निर्वाचित हुनुभएका ढकाललाई उपाध्यक्षको जिम्मेवारी प्रदान गरिएको छ । निर्वाचनसँगै नेपालको सहकारी अभियानले एशियाली स्तरको बचत तथा ऋण सहकारी अभियानमा महत्वपूर्ण प्रतिनिधित्व प्राप्त गरेको हो ।

सभाले दक्षिण कोरियाबाट यङ–चुल कोच, थाइल्यान्डबाट दानुक्रित कटाम्पाकोम, नेपालबाट चन्द्रप्रसाद ढकाल, फिलिपिन्सबाट रे डी. लाबासानो र ताइवानबाट लियो चुन फोङलाई सञ्चालकमा निर्वाचित गरेको छ । त्यसैगरी, इन्डोनेसियाबाट डा. वारे साबोर डोमिनिकसलाई प्रथम र श्रीलंकाबाट एल. बी. देसनायकेलाई द्वितीय वैकल्पिक सञ्चालकमा निर्वाचित गरेको छ । अकूको सञ्चालक समितिमा निर्वाचित सञ्चालकमध्ये कुनै कारणवश पद रिक्त भएमा पहिलो प्राथमिकतामा रहेका वैकल्पिक सञ्चालक स्वतः सञ्चालक बन्ने प्रचलन रहेको छ । यस व्यवस्थाका कारण प्रथम वैकल्पिक सञ्चालक आगामी दिनमा सञ्चालक बन्ने सम्भावना समेत रहनेछ  ।

नेपालबाट चन्द्रप्रसाद ढकाल अकूको उपाध्यक्षमा चयन हुनुलाई नेपालको बचत तथा ऋण सहकारी अभियानको अन्तर्राष्ट्रिय स्तरमा बढ्दो पहिचान र प्रभावका रूपमा समेत लिइएको छ ।