काठमाडौं । एशियन क्रेडिट युनियन (अक्कू) फोरम–२०२३ मा सहभागी हुन नेपाल आइपुग्नुभएका अक्कूका अध्यक्ष योनसुक किमसहितको ४ सदस्यीय टोलीलाई नेफ्स्कूनका अध्यक्ष परितोष पौड्यालले स्वागत गर्नुभएको छ । स्वागतका लागि त्रिभुवन अन्तर्राष्ट्रिय विमानस्थल पुग्नुभएका अध्यक्ष पौड्यालले नेफ्स्कूनको प्रायोजनमा फोरम आयोजना गरेर एशियाली क्रेडिट युनियनकर्मीहरुलाई नेपालमा स्वागत गर्न पाउँदा खुसी व्यक्त गर्नुभयो । संघका सहायक कार्यकारी अधिकृत राधेश्याम श्रेष्ठ र कार्यक्रम अधिकृत रञ्जनमणि पौड्याल पनि स्वागत कार्यक्रममा उपस्थिति जनाउनुभएको थियो । 

एशियाली ऋण महासंघ (अक्कू) को आयोजना र नेपाल बचत तथा ऋण केन्द्रीय सहकारी संघ लि. (नेफ्स्कून) एवं राष्ट्रिय सहकारी बैंकको संयुक्त प्राविधिक सहजीकरणमा काठमाडौंको द होटल सोल्टीमा अक्कू फोरम, २०२३ को ग्राण्ड ओपनिङको तयारी भईरहेको छ  । 

फोरममा एसियाली ऋण महासंघका प्रतिनिधिहरू र सदस्य राष्ट्रहरू नेपाल, अस्ट्रेलिया बङ्गलादेश, इन्डोनेसिया, भारत, जापान, दक्षिण कोरिया, मलेसिया, फिलिपिन्स, सिङ्गापुर, श्रीलङ्का सहितका १९ राष्ट्रका ४१७ जनाले सहभागिता जनाएका छन् । कार्यक्रममा एसियाली ऋण महासंघको ४२ औं साधारणसभा समेत हुनेछ । फोरमको ग्राण्ड ओपनिङ सेप्टेम्बर १५ मा हुँदैछ ।

अक्कू प्रि फोरमको उद्घाटन भूमि व्यवस्था सहकारी तथा गरिबी निवारण मन्त्रालयका सचिव गोकर्णमणि दुवाडीले भदौ २५ गते गर्नुभएको थियो ।