एजेन्सी । सन् २०२३ मा बहस तथा पैरवीका क्षेत्रमा प्राप्त उल्लेख्य उपलब्धि, भएगरिएका प्रयास र भावी रणनीतिहरु समावेश गर्दै विश्व ऋण परिषद् (ओकू) ले नयाँ वार्षिक प्रतिवेदन २०२३ सार्वजनिक गरेको छ ।

खासगरी अन्तर्राष्ट्रिय नियमनकारी निकायहरुसँग विश्व क्रेडिट युनियन अभियानका साझा मुद्दाहरुमा गरिएका प्रयास र उपलब्धिहरु प्रतिवेदनमा समेटिएको छ । 

संयुक्त राष्ट्र संघ, विश्वका २० ठुला अर्थतन्त्र भएका मुलुकहरुको समूह–जी २०, फाइनान्सियल स्टेबिलीटी बोर्डका साथै द्धन्दमा फसेको युक्रेनमा नयाँ क्रेडिट युनियन ऐन निर्माण र त्यसलाई त्यहाँको संसदबाट अनुमोदन गराउने दिशामा खेलेका भूमिकाहरुबारे प्रतिवेदनमा जानकारी गराइएको छ ।

यस्तै, प्रतिवेदनमा ओकूले वित्तीय समावेशिता, साक्षरता, प्रविधि विकास तथा शिक्षा, तालिमका क्षेत्रका गरेका क्रियाकलापहरुसँगै रणनीतिक साझेदार र सदस्य संघ संस्थासँगको सम्बन्धबारे पनि उल्लेख छ ।

ओकूले वित्तीय पहुँच नपुगेका अफ्रिकाका विपन्न मुलुकहरु, युक्रेन, दक्षिण अमेरिकी मुलुक पेरु, भेनेजुएला, मध्य अमेरिकी मुलुक कोस्टारिका आदिमा अमेरिकी अन्तर्राष्ट्रिय सहयोग नियोग (यूएसएड)सँग मिलेर काम गर्दै आएको छ । यसैगरी, प्रतिवेदनमा ओकूको वित्तीय अवस्था पनि समावेश छ ।

विश्वभरका क्रेडिट युनियनहरुको छाता संगठन ओकूमा हाल विश्वका ९८ मुलुकका ८२ हजार ७ सय ५८ क्रेडिट युनियनमा गरी ४० करोड ३९ लाख ७६ हजार ४९ सदस्य आवद्ध छन् । नेफ्स्कूनले सन् २०१८ मा ओकूको प्रत्यक्ष सदस्यता प्राप्त गरेको हो ।