एजेन्सी । अन्तर्राष्ट्रिय सहकारी महासंघले प्रदान गर्ने सहकारी क्षेत्रको सबैभन्दा ठूलो पुरस्कार रोचडेल पायोनियर्स अवार्ड २०२४ का लागि आवदेन माग गरेको छ । सहकारी क्षेत्रमा नवप्रवर्तन तथा वित्तीय रुपमा सबल र दिगोपनामार्फत सदस्यहरुको हित हुने क्रियाकलापमा योगदान दिने व्यक्तिलाई यो सम्मान प्रदान गरिन्छ । खासगरी सहकारी अगुवालाई प्रदान गर्ने यो सम्मान विशेष परिस्थितिमा मात्र संस्थालाई प्रदान गरिन्छ ।

उक्त पुरस्कार आगामी नोभेम्बर २५ देखि सम्म ३० भारतको राजधानी नयाँ दिल्लीमा आयोजना हुने अन्तर्राष्ट्रिय सहकारी सम्मेलनको समयमा प्रदान गरिनेछ ।

आईसीएका सदस्य संघ संस्था एवम् सहकारी अभियानप्रति ऐक्यबद्धता जनाउने निकायबाट यस्ता व्यक्तिको सिफारिश गर्न सकिने जनाइएको छ । पुरस्कारका लागि आगामी अगष्ट ३१ सम्म आवेदन दिन सकिने आईसीएले जनाएको छ ।

सहकारी अभियानलाई स्थापित गराउन बेलायतको म्यानचेष्टरस्थित रोचडेल सहरका अगुवाहरुले खेलेको भूमिकाको कदर स्वरुप आईसीएले यो सम्मान स्थापना गरेको हो ।