काठमाडौ । नेपाल बचत तथा ऋण केन्द्रीय सहकारी संघ लि.(नेफ्स्कून) बाट आफनो सहकारी कोष काठमाडौ महानगरपालिका ७ गंगाहिटी काठमाडौको स्क्यान अन्तर्गत पहिलो निरिक्षण र प्रोवेसन स्थलगत सुपरिवेक्षण माघ २२ गते सम्पन्न भएको छ । 

स्थलगतका क्रममा संस्थाको  वित्तीय  कानूनी जोखिमको अवस्था, वित्तीय जोखिम, बजार जोखिम तथा सुशासन जोखिमका विषयमा सुपरिवेक्षण गरिएको थियो । व्यवस्थापक राजेश कुमार महर्जन नेफ्स्कूनले संस्थाको हालका नियामकीय परिवर्तनका विषयबस्तु समेत सूचकका रुपमा समावेश गरी स्क्यान कार्यक्रम ल्याएकोमा खुशी व्यक्त गर्दै नेफ्स्कूनको स्तरीकरण कार्यक्रमको नियमित सुपरिवेक्षणबाट संस्थाको वित्तीय स्वस्थता विकास गर्न, जोखिम न्यूनीकरण गर्न, आन्तरिक सुदृढीकरण र व्यवसायिकतामा सहयोग पुग्ने बताउनुभयो  ।

संस्थाका सञ्चालक समिति पदाधिकारी तथा सदस्यहरु, व्यवस्थापनको सहभागितामा सञ्चालन भएको स्थलगत सुपरिवेक्षणका क्रममा संस्थाका पूर्व अध्यक्ष तथा सल्लाहकार कमल खरेलले यस कार्यक्रमबाट संस्थाको वित्तीय सूचक सुधार, नियामकीय व्यवस्थाको अद्यावधिक गर्न, सुशासन कायम गर्न, सदस्यहरुको विश्वास तथा संरक्षणमा सहयोग पुगेको तथा निरन्तर मार्गदर्शनको अपेक्षा गरेको बताउनुभयो ।
 
नेफ्स्कूनको नियमित सुपरिवेक्षणबाट संस्थाको निरन्तर विकासमा साकोसको सञ्चालक र व्यवस्थापन सदैव सक्रिय रहने प्रतिवद्धता व्यक्त भएको छ । स्क्यान तथा प्रोवेसनको स्थलगत सुपरिवेक्षण कार्यक्रम अधिकृत सोविता मैनाली तथा अनुगमन सहजकर्ता लीला अम्गाइले गर्नु भएको थियो ।